Qırımtatar studentleri Türkiye Cumhuriyeti Şimaliy Qıbrıznıñ eñ yahşı universitetinde oquycaqlar

22 Avgust 2013

2013 senesi avgust 22 künü Meclis ofisinde Milliy Meclis reisi Mustafa Cemilev ve Meclisniñ Tasil ve medeniyet idaresiniñ başı, “Maarifçi” birleşmesiniñ reisi Safure Kacametova Türkiye Cumhuriyeti Şimaliy Qıbrıznıñ eñ yahşı universitetinde oqumağa ketecek studentlernen körüştiler. Qırımtatar ve ingliz tili boyunca sınavlardan Sabriye Abduraşitova, Erol Abdulcelilov, Dilâra Samedinova ve Akim Ümerov keçtiler. Eki genç birinci kursqa qabul etildiler, ekisi ise Qıbrızda magistraturada oquvnı devam etecek.

“2009 senesi Levköşe(Nikosiya) şeerinde bulunğanda Meclis reisi Mustafa Cemilev ve Yaqın Şarq universitetiniñ rektorı Suat Günsel imzalağan añlaşmağa köre er yılı bu universitette qırımtatar studentleri içün 3-4 yer ayırılacaq, – dedi Safure Kacametova. – Ebet, bu universitette oquv pek paalı, amma universitet rektorlığı qırımtatar studentleri içün em oquv, em yaşavnı bedava temin etti. Şimaliy Qıbrızdaki qırımtatar diasporası ise diger masraflarnı boyunlarına aldılar. Bundan da ğayrı studentlerimiz er ay stipendiya alacaqlar”.

Meclis reisi Mustafa Cemilev qayd etti ki, bu ödemeli universitet olıp, oquv aqqı 7-12 biñ yevro civarındadır. Dersler ingliz tilinde keçe ve kelecekte studentler içün bu pek büyük istiqballerni aça. Onıñ aytqanına köre Levköşede Meclis vekilleri bar ve olar studentlerge er angi zarur yardımda bulunırlar.

Soñra Yaqın Şarq universitetiniñ mezunı Arzı Emirova yurt tışında tasil ve studentlik hayat teessuratlarınen paylaşıp, studentler ve mezunlar adından Mustafa Cemilev ve Safure Kacametovağa çetelde oqumaq imkânını bergenleri içün teşekkür bildirdi. Oqumağa kirgen studentlerge ise bu yardımnıñ qadirini bilip, yahşı oqumalarını tevsiye etti.