Qırımtatar Milliy Meclisiniñ vekilleriniñ Türkiye Büyük Millet Meclisiniñ reisiniñ muavini Bekir BOZDAĞ ile körüşüvi

25 Oktâbr 2024

2024 senesi orta küz ayınıñ 24-nde Rığa şeerinde (Latviya) Halqara Qırım platformasınıñ parlament sammitinde Qırımtatar Milliy Meclisiniñ reisi Refat Çubarov ve Türkiye Büyük Millet Meclisiniñ Reisiniñ muavini Bekir BOZDAĞnen körüşüv olıp keçti.

Körüşüvde Qırımtatar Milliy Meclisiniñ reisiniñ birinci muavini Nariman CELÂL, Qırımtatar Milliy Meclisiniñ azası Gayana YÜKSEL, Türkiye Büyük Millet Meclisiniñ mebusı, Ukraina Yuqarı Şurasınen TBMMniñ parlamentlerara munasebetler gruppasınıñ reisiniñ muavini İbrahim Ufuk KAYNAK iştirak ettiler.

Körüşüvniñ iştirakçileri dostane ve açıq şekilde olıp keçti, Rusiye orduları tarafından işğal etilgen Qırımdaki vaziyetni ve qırımtatar halqınıñ aq-uquqlarınen bağlı vaziyetni muzakere ettiler, Qara deñiz-Aq deñizi bölgesindeki devletlerniñ munasebetlerine tesir ete bilecek vaqialarnıñ inkişafınıñ tahminlerinen paylaştılar.

Aynı zamanda, Qırımtatar Milliy Meclisiniñ azaları Türkiye Büyük Millet Meclisiniñ reisiniñ muavini Bekir BOZDAĞ ve TBMMniñ mebusı, TBMM Ukraina Yuqarı Şurasınen parlamentlerara munasebetler boyunca mebuslar gruppasınıñ reisiniñ muavini İbragim Ufuk KAYNAKnı işğal etici memleketniñ Qırımda kolonial siyaseti ve qırımtatar halqınıñ taqip etilmesi aqqında tafsilâtlıca haberdar ettiler, öz ortaqlarını halqara toplulıq ve devletlerniñ Ükümetleriniñ, hususan Türkiyeniñ, Kreml mabüslerini azat ettirmek içün ğayretlerini quvetleştirmek tekliflerinen tanış ettiler.

Körüşüvde Türkiye Cumhuriyeti ve Türkiye halqınıñ Ukrainağa Rusiye Federatsiyasınıñ silâlı tecavuzına qarşı arbiy ceetten qol tutması meselesi ayrı yer aldı.

Qırımtatar Milliy Meclisiniñ azaları Rusiye Federatsiyası tarafından Qırımnıñ işğalini tanımaması ve Ukraina devletiniñ topraq bütünligine qoltutuv boyunca tutqan noqta-i nazarı içün Türkiye Prezidenti ve Parlamentine minnetdarlıını bildirdiler.

Körüşüvniñ soñunda onıñ iştirakçileri Qırımtatar Milliy Meclisi ve Türkiye Büyük Millet Meclisiniñ reberligi ve mebusları arasında devamlı mesleatlarnıñ devam etilmesiniñ müimligini tasdıqladılar.