Qırımtatar milliy küreşiniñ ayatiy printsipleri

28 Avgust 2011

26 – 28 avgust künleri 1-nci Qırım cumhuriyet balalar ve ösmürler sport mektebinde umumtasil orta mekteplerniñ cismaniy terbiye ocaları ve trenerler içün qırımtatar medeniyeti ve halq sport ananeleriniñ terkibiy qısmı olğan KÜREŞ (quşaq küreşi) inkişafınıñ meselelerine bağışlanğan seminar-trening olıp keçti.

Seminarnıñ başında onıñ iştirakçileri ögünde Bütündünya qırımtatar kongressiniñ prezidenti, KÜREŞ Qırım milliy küreş federatsiyasınıñ fahriy prezidenti Refat Çubarov çıqışta bulunıp, Qırımtatar milliy küreşini ğayrıdan tiklev ğayesi etrafında birleşken trenerler, sport teşkilâtçıları ve cemaatçılıqnıñ ayrıca rolüni qayd etti. Bunıñ kibi de Refat Çubarov seminar iştirakçileriniñ diqqatını yaşlarğa sportnen, bilhassa qırımtatar milliy küreşinen oğraşmağa imkân yaratmaqnıñ müimligine celp etti. Aynı zamanda Refat Çubarov şunı da qayd etti ki, daa nasıldır eki yıl evelsi meydanğa ketirilgen KÜREŞ Qırım milliy küreş federatsiyasınıñ faaliyeti sayesinde Qırımda keçirilgen deyerlik er bir umumhalq tedbirinde küreş boyunca yarışlar ola.

Şusı da quvançlı ki, küreşnen çeşit millet balaları büyük isteknen meşğul olğanı qırımtatarlarnıñ bu sport çeşitine itiyac olğanını köstere. “Lâkin biz ögümizge qoyğan – er bir qasaba ve köyge qadar barmaq vazifemiz alâ daa müim olıp qalmaqta. Mezkür meseleni çezmek içün KÜREŞ Qırım milliy küreş federatsiyası yerli meclisler, trener ve cemaatçılıqnen çalışuvnı devam etecek”.

Bu munasebetnen Refat Çubarov seminar iştirakçileriniñ diqqatını bu işte büyük rol oynağan orta mektep cismaniy terbiye ocalarınıñ areketlerine celp etti. “Keçken eki yılnıñ tecribesi şunı köstere ki, Federatsiya orta mektep ve yerlerdeki faallernen iş tutsa sport sektsiyalarını açmaq ve zarur eşyalarnı almaq imkânı tapıla. Biz bu işni birinci nevbette köy mekteplerinde devam ettirmek kerekmiz, çünki köylerde yaşlar içün sportnen oğraşmağa iç te imkân yoqtır. Öz tarafından Qırımtatar halqınıñ Meclisi ve Bütündünya qırımtatarlar kongressiniñ Koordinatsion keñeşi bundan soñ da KÜREŞ Qırım milliy küreş federatsiyasınıñ faaliyetine qoltutacaq”, – dedi Refat Çubarov.

Seminar iştirakçileri ögünde çıqqan Yunusov Şevket (“Maarifçi” cumhuriyet birleşmesi) ve Abduraman Egiz (“Bizim Qırım” Halqara yaşlar cemaat teşkilâtı) temsil ettigi teşkilâtları Qırımnıñ umumtasil mekteplerine qırımtatar milliy küreşi olğan küreşni inkişaf ettirüvge yardım etmege azırlığını bildirdiler.

Seminar açılış merasiminiñ soñunda Refat Çubarov ve Ali Hamzin avgustnıñ 11-13 künleri Rusiyeniñ Astrahan şeerinde olıp keçken dünya çempionatında kümüş medal saibi Aleksey Avdeyevge ve onıñ treneri Sergey Burâkqa Qırımtatar halqı Meclisi ve Bütündünya qırımtatarlar kongressiniñ Fahriy yarlıqları ve rağbetlendirüv mukâfatlarını taqdim ettiler. Bunıñ kibi de rağbetlendirüv mukâfatlarınen Murtazayev Enver ve Kosorotov Aleksandr da taqdirlendiler.

Malümat: avgust 11-13 künleri Rusiyeniñ Astrahan şeerinde olıp keçken kuşaq küreşi boyunca dünya çempionatında dünyanıñ 17 devletinden kelgen 140 küreşçi iştirak etti. 1991-1993 senesi doğğan Qırımlı sportçılar böyle yüksek seviyedeki yarışqa ilk kere qatıldılar. Bazı çeki kategoriyalarında 18-20 nefer halqara klass sport ustaları, Avropa ve dünya çempionları küreştiler.

Qırım sportçılar komandasını küreşçiler Timoşçuk YE., Qadırleyev A. (Çernomorskoye qasabası), Mamedov A.( Saq rayonı), Muratov R., Gaponenko D.( g. Kezlev), (Avdeyev A., Haybulayev Ş, Konusov K(Seytler rayonı), (Ablâkimov F, Memetov S.(Aqmescit ş.) temsil ettiler.