Qırımtatar halqınıñ sürgünliginiñ 80. yıllığına bağışlanğan Avropa Şurasınıñ orta ilânı
![Qırımtatar halqınıñ sürgünliginiñ 80. yıllığına bağışlanğan Avropa Şurasınıñ orta ilânı](https://qtmm.org/wp-content/uploads/2024/05/20230224-news-cm-ukraine-49392_048-1-2.jpg)
Litvaniya Tış işleri naziri ve Avropa Şurasınıñ Nazirler eyyetiniñ başı Ğabrielius Landsberis, Parlament asambleyasınıñ prezidenti Teodoros Rusopulos, Baş kâtip Mariya Peyçınovıç-Burıç ve İnsan aqları komissarı Maykl O’Flaertiniñ orta ilânı.
Bu sene şura totalitar rejimi tarafından 1944 senesi keçirilgen qırımtatar halqınıñ Qırım yarımadasından sürgünliginiñ 80. yıllığı oldı. Mayıs ayınıñ 18. künü Ukrainada Qırımtatar halqınıñ genotsid fedalarınıñ hatıra künü qayd etile. Bu kün biz, şura akimiyeti tarafından sürgünlikke ve çoqusı içün soñ yolğan yolğa yollanğan bütün qırımtatar halqını, ayrıca balaları, qadınları ve qart insanlarını ürmetnen añamız. Asırlar devamında azaplanğan, taqip etilgen ve ayırım çekkenlerni añamız.
Yazıq ki, qırımtatar halqınıñ derdi devam ete. Sürgünlikten 80 seneden soñ rusiye reberleri qırımtatarlarğa qarşı şura cinaiy repressiyalar, taqipler ve basım siyasetini devam ettire. O, añlı tarzda olarnıñ aqlarını boza, qanunsız olaraq insanlarnı ordusına mobilizatsiya ete, medenyet mirasını yoq ete, tarihnı yañıdan yaza, tasil ve içtimaiy yaşayışnı arbiyleştire.
Kerçekten de 2014 senesi kiçik aynıñ soñunda Qırım qanunsız olaraq işğal etilgen vaqıt rusiyeniñ Ukrainağa qarşı tecavuzı başlandı. 2022 senesi kiçik ayda Rusiyeniñ Ukrainağa tolu miqyaslı arbiy tecavuzı başlanğan soñ qırımtaatarlarnıñ milliy özdeşligini yoq etmek içün olarnı daa çoq taqip etmege başladılar.
Biz, Ukrainada Qırımnıñ tamır halqı olaraq tanınğan qırımtatar halqına ürmet bildiremiz. Em şura totalitar rejimi, em de Rusiye Federatsiyasınıñ insan aqlarını bozğanını ciddiy şekilde takbih etemiz.
Rusiye Federatsiyasını qırımtatarlarnı taqip etmemege, vaqtınca işğal etilgen Qırım ve Aqyar şeerinde insan aqlarını bozmamağa, qanunsız olaraq apis etilgen qırımtatarlarnı azat etmege mecbur etmek ve işğalli devletni halqara uquqqa riayet etecegini temin etmek içün biz Avropa Şurasınıñ azası olğan devletler ve halqara cemaatnı oña diplomatik tesirini çoqlaştırmağa çağıramız.
Ukrainanıñ ğalebesi ve Qırımnıñ işğalden azat etilmesi, tamır qırımtatar halqına qarşı muntazam repressiyalarnı bitirir ve insan aqlarına ürmet yañıdan yaratır edi.
Ukrainadaki Avropa Şurasınıñ Ofisi bu aqqında haber berdi.