Qırımtatar halqınıñ Meclisi semetdeşlerimizge birlikte bütün zarur çare-tedbirler körülip, cinayetçiler Ukraina qanunlarına muvafıq cezalandırılacaqlarını işandıra

06 Sentâbr 2011

MİLLİY MECLİS BEYANATI

Sentâbr 2-den 3-ne keçer gecesi Aqmescit rayonınıñ Qulçuq köyünde  soñundan belgilengen şahsılar tarafından yapılğan cinayet aqibetinde  19 yaşlı Emil Ğaniyev öldürildi.

Qatiller bunıñ kibi de  daa dört semetdeşimizni pıçaqnen yaraladılar, bulardan ekisi Vitaliy Velilâyev ve  Asan Üseinovnıñ alı ağır.  Sentâbr 3 künü sabadan  Emil Ğaniyev, Vitaliy Velilâyev, Asan Üseinov, Seyran Maqsutov ve Dilâver Ebidlâyevge qarşı yapılğan cinayet ve şu cinayet aqibetinde Emil Ğaniyevniñ elâk olğanı aqqında haber alınğanınen Qırımtatar halqı Meclisiniñ yuridik hızmeti Meclis reberleriniñ avalesi boyunca  cinayetçilerni qanuniy sürette cezalamaq maqsadında  yüz bergen cinayetni  tafsilâtlı ögrenmege kiriştiler. 

Meclis adliyecileri  zarar körgenlerniñ soy-aqrabaları, Qulçuq köy cemaatı, yerli meclis ve Aqmescit regional meclisnen sıqı işbirlikte  qırımtatarlarğa nisbeten yapılğan cinayetni  er taraflı ve obyektiv taqiqat etmekteler.

 Advokatlarnıñ bildirgenine köre  al-azırda eki cinayi iş açıldı.  Birisi  Ukraina Cinaiy Kodeksiniñ 296-ncı maddesi 2-nci qısım “Qavğacılıq” ve ekincisi 296-ncınıñ 4-nci qısmı “Şiddetli qavğacılıq” ve 115-nci madde 2-nci qısmı “Bile turıp öldürüv”. Kötekleşüvniñ 4  iştirakçisinden ekisi Gevorkân Karen ve  Ovakân Ara yaqalandılar. Qaçıp ketken Arutunân Agrişti ve Agrutunân Andronikni qıdıruv ilân etildi.  Bulardan birisi  pıçaqnen ücüm etkeni aqibetinde 19 yaşlı Emil Ğaniyev elâk oldı.

Qırımtatar halqınıñ Meclisi  Emil Ğaniyevniñ soy-aqrabalarına taziyesini, yaralanğan Vitaliy Velilâyev, Seyran Maqsutov, Asan Üseinov ve Dilâver Ebidlâyevniñ yaqınlarına ise göñüldeşlik  bildirip, semetdeşlerimizge birlikte bütün zarur çare-tedbirler körülip, cinayetçiler Ukraina qanunlarına muvafıq cezalandırılacaqlarını işandıra  

Qırımtatar halqı Meclisiniñ matbuat hızmeti