Qırımtatar halqınıñ meclisi «Qırımtatar halqı qurultayı delegatlarını saylav boyunca nizam» leyhasınıñ muzakeresi başladı

26 November 2012

2012 senesi noyabr 26-da Aqmescitte Meclisniñ nevbetteki toplaşuvı ötkerildi.

Bir qaç saat devam etken toplaşuvda Meclis azaları “Qırımtatar halqı qurultayı delegatlarını saylav boyunca nizam” leyhasını madde-meddesinen muzakere ettiler.

Meclis reisiniñ birinci muavini Refat Çubarov toplaşuv iştirakçilerine Merkeziy saylav komissiyası tarafından işlengen “Qırımtatar halqı qurultayı delegatlarını saylav boyunca nizam” leyhası”ndan ve İşçi gruppağa Meclis azalarından ve regional mejlislerniñ reislerinden tüşken tekliflerden tertip etilgen teñeştirüv tablitsasını taqdim etti.

“Qırımtatar halqı qurultayı delegatlarını saylav boyunca nizam” leyhasını madde-meddesinen muzakere etüv devamında Meclis azaları ve davet etilgenler nizamnıñ yarısını baqıp çıqtılar. Toplaşuv işinde bir künlük tenefüs ilân etilip, noyabr 28-inde kene devam etecek.