Qırımtatar halqınıñ Meclisi işbirlik ve Qırım em de Ukrainadaki bütün siyasiy firqalar ve cemaat teşkilâtlarınen dialog içün açıq

03 Avgust 2011

Qırımtatar halqı Meclisiniñ adına “Demokratiçeskiy alyans” cemaat teşkilâtı Qırım cumhuriyet bölüginiñ “Demokratiçeskiy alyans” cemaat teşkilâtı Kâtibiyetiniñ sabıq reberi R. Şaymardanovnıñ 2011 senesi iyül 19 künü Aqmescitte olıp keçken matbuat konferentsiyasında seslendirgen beyanatı munasebetinen “Resmiy reddiye” keldi.

Demokratiçeskiy alyans” cemaat teşkilâtı Qırım cumhuriyet bölüginiñ reisi Svetlana Yereşçenko imzalağan mezkür “Resmiy reddiye”de “R. Şaymardanovnıñ “Demokratiçeskiy alyans” teşkilâtı reberleri tarafından provokatsiya olaraq qıymet kesilgen fikirleri içün muhtariyet sakinleri, qırımtatar milleti ve qırımtatar halqınıñ vekâletli organı ögünde afu sorala”

Aşağıda “Demokratiçeskiy alyans” cemaat teşkilâtı Qırım cumhuriyet bölüginiñ “Resmiy reddiye”si metinini Qırımtatar halqı Meclisiniñ resmiy saifesinde tolusınen yerleştirerek Meclisniñ matbuat hızmeti “Demokratiçeskiy alyans” cemaat teşkilâtı Qırım cumhuriyet bölügini afu etkenini bildire.

Öz tarafından Qırımtatar halqı Meclisiniñ matbuat hızmeti Qırımtatar halqınıñ Meclisi Ukraina ve Qırımda yarımada ve bütün sakinleriniñ menfaatları oğrunda çalışqayen ve faaliyetini demokratik printsiplerde qurğan cemi siyasiy partiyalar ve cemaat teşkilâtlarınen işbirlikke ve subetleşmege azırlığını bildire.

Resmiy reddiye

2011 senesi iyül 29 künü Aqmescitte matbuat konferentsiyasında “Demokratiçeskiy alyans” cemaat teşkilâtı Qırım cumhuriyet bölügi Kâtibiyetiniñ sabıq reberi R. Şaymardanov Cumhuriyet milletler komitet ive Meclis arasında añlaşma “gizli-qapaqlı” olğanını söyledi. Bunıñ kibi de R. Şaymardanov Meclisni “qanundan tış, cedvelge alınmağan teşkilât” dep adlandıra ve Meclisni topraq uçastkalarını almaq içün cedvellerni sahteleştirgeninde qabaatladı.

“Demokratiçeskiy alyans” cemaat teşkilâtı resmiy sürette şunı bildire ki, bu informatsiya teşkilâtnıñ resmiy fikiri degil de , R. Şaymardanovnıñ şahsiy fikridir.

Biz muhtariyat sakinleri, qırımtatar milletiniñ vekilleri, cümleden qırımtatar halqınıñ vekâletli organı olğan Milliy Meclis azalarından afu soraymız

Öz çıqışını bizlernen künevelden kelişmegeni alda yapqan R. Şaymardanovnıñ bu fikirlerine biz provokatsiya, dep qıymet kesemiz. Teşkilât Nizamnamesini bozğanı (cümleden yetekçi organnıñ qararlarına boysunmağanı ve “Demokratiçeskiy alyans” teşkilâtınıñ itibarını tüşürgen areketler yapqanı munasebetinen “Demokratiçeskiy Alyans” teşkilâtınıñ idaresi öz toplaşuvında R. Şaymardanovnı teşkilât azalığından çıqarmaq qararını aldı.

“Demokratiçeskiy alyans” teşkilâtınıñ Qırım cumhuriyet bölügi kütleviy informatsiya vastalarına R. Şaymardanovnıñ fikirini teşkilâtnıñ fikiri dep körmemekni rica ete.

Sayğılarım ile

“Demokratiçeskiy alyans” teşkilâtı Qırım cumhuriyet bölüginiñ başı

Svetlana Yereşçenko

Kontaktı: 099-717-34-24
e-mail: sveta.ereschenko@gmail.com