Qırımtatar halqınıñ Meclisi «Avropa Hatıra ve Vicdan platforması» nıñ azası oldı

Qırımtatar halqınıñ Meclisi adresine ofisi Çehiyanıñ Praga şeerinde yerleşken “Avropa Hatıra ve Vicdan platforması”ndan kelgen mektüpte resmiy sürette teşkilât Nizamnamesiniñ 9-ncı maddesi 4 –nci punktı boyunca Qırımtatar halqınıñ Meclisi “Avropa Hatıra ve Vicdan platforması”nıñ azası olğanı bildirile.

Qırımtatar halqınıñ Meclisinen beraber bu teşkilâtqa Avropanıñ daa 7 müessise ve teşkilâtları qabul etildi:

Kommunizm qurbanları olğan sabıq siyasiy mahbüslerniñ halqara birleşmesi (Almaniya)

• Köknese Fondı (Latviya)

• “Hatıra” vatandaş birleşmesi (Çehiya)

• “48” Praga Akademik klubı (Çehiya)

• “Meeting Point Music Messiaen” medeniy merkezi (Almaniya)

• Azatlıq areketi tedqiqatlarınıñ merkezi (Ukraina)

• Kommunizm ve kommunimzge qarşı areket qurbanları (Romaniya).

Mektüpte qayd etile ki, 2012 senesi iyün 20-de Avropa parlamentiniñ azaları Vasiyler keñeşiniñ birinci beş azası Sandra Kalniyete, Laslo Tokeş, Tunne Kelam, Milan Zver ve Vitautas Landsbergis Vasiyler keñeşiniñ azaları olaraq tayinlendiler. Endi “Avropa Hatıra ve Vicdan platforması”nıñ Avropa Birliginiñ 13 devletinden, ve bunıñ kibi de Ukrainadan, 29 azası bar

Mektüpniñ soñunda “Avropa Hatıra ve Vicdan platforması”nıñ icra direktorı D-r Nila Vinkelmann yaza: ” Platforma icra komiteti adından sizlerni “Avropa Hatıra ve Vicdan platforması” azaları sıfatında hayırlamaq ve selâmlamaq isteymiz. Sizler ile birlikte iş alıp baracağımızdan memnünmiz”

MALÜMAT İÇÜN:  2011 senesi oktâbr 4 künü Pragada Vışegrad gruppası (V4 – Macaristan, Poloniya, Slovakiya, Çehiya) devletleri baş nazirleriniñ körüşüvinde “Avropa Hatıra ve Vicdan platforması” meydanğa ketirilgen edi. Totalitarizm tarihını ögrenüve ihtisaslaştırılğan19 müessise ve teşkilâtnıñ yetekçileri ve Avropa Birligindeki 13 devlet bu birleşmeniñ meydanğa ketirilmesi aqqında qararnı imzaladılar.

“Avropa Hatıra ve Vicdan platforması” boyunca daimiy işçi gruppa Çehiya cumhuriyeti ve Totalitar rejimlerni tedqiq etüv Çehiya İnstitutınıñ birlikteki teşebbüsine köre teşkil etildi. Bu institut mezkür gruppanıñ işini yönetmekte. “Platforma”nı quruv teşebbüsine Avropa parlamenti de qoltuttı.

Onıñ 2009 senesi aprel 2-de alğan qararında “Platforma” totalitarizm tarihını ögrenüvde ihtisaslaştırılğan milliy müessiseler ağlarına qoltutuvnı teminlemeli.

Avropa komissiyasınıñ 2010 senesi dekabr 22-de alğan mahsus qararında “Platforma”nıñ qurulması eñ müim Avropa teşebbüsi olaraq tanıldı.

“Platforma” Avropanıñ diger devletlerinde faaliyet köstergen onıñ kibi teşkilâtlar içün açıqtır.

“Avropa Hatıra ve Vicdan platforması”nı şu devletler tesis ettiler:

Bulğaristan: Hanna Arendt merkezi, Sofiya;

Çehiya cumhuriyeti: Totalitar rejimler tedqiqatı İnstitutı, telükesizlik hızmetleriniñ arhivleri;

Estoniya: Estoniya Tarihiy hatıra institutı, Ünitas Fondı;

Almaniya: Sabıq Almaniya Demokratik Cumhuriyeti devlet Telükesizlik hızmeti aktları boyunca mahsus vekil, Berlin Hohenşonhauzen memorialı,

Hanna Arendt cemiyeti, Köln;

Macaristan: Merkeziy ve Şarqiy Avropa tarihı ve cemiyetini tediqiq etüv cemaat fondı, Terror evi müzeyi;

Latviya: İşğal müzeyiniñ birligi;

Litva: Litvadaki natsist ve sovet işğalci rejimleriniñ cinayetlerine qıymet kesmek içün halqara komissiya, Litva genotsid ve qarşı küreş tedqiqatınıñ merkezi,

Niderlandı: Totalitar rejim ve qurbanları tarihınıñ fondı;

Poloniya: Milliy hatıra müzeyi, Varşava isyanı müzeyi;

Romaniya: Kommunist cinayetleri ve Romaniya muacirligi hatırasını ögrenüv institutı ;

Slovakiya: Yan Langos Fondı;

Sloveniya: Milliy barışıqlıq tedqiqatınıñ merkezi;

İsveçre: Kommunizm cinayetleri boyunca İnformatsiya institutı