Qırımtatar halqınıñ lideri Mustafa Cemilev OSCE milliy azlıqlarnıñ işleri boyunca Aliy komissarı Astrid Tors ile körüşti

25 Mart 2014

Mart 24 künü Kiyevde Qırımtatar halqınıñ lideri Mustafa Cemilev OSCE milliy azlıqlarnıñ işleri boyunca Aliy komissarı Astrid Tors ile körüşti.

Rusiye qoşunları Qırımğa kirmesi, “referendum” keçirilmesi ve resmiy işğal aqibetinde Ukrainada meydanğa kelgen vaziyetni ögrenüv kibi müim vazifenen kelgen Aliy komissar devlet adamları ve cemaat teşkilâtlarnıñ yolbaşçılarınen körüşüvler keçirmekte.

Böyle körüşüvlerden birincisi Mustafa Cemilev ile olıp, onda Meclis reisiniñ muavini, Kiyevdeki qırımtatar cemiyetiniñ başı Aslan Ömer Qırımlı da iştirak etti.

Devamlı subet vaqtında Astrid Tors Ukrainanıñ diger vatandaşları sırasında işğal etilgen Qırım toprağında bulunğan qırımtatar halqınıñ vaziyeti, qırımtatar halqınıñ tamır halq olaraq aqlarını ğayrıdan tiklev ve inkişaf ettirüvniñ variantlarınen meraqlandı.

Mustafa Cemilev Aliy komissarğa Qırımda insan aqlarını bozuv alları yani öldürüv, insan hırsızlanması, qorquzuvlar ve Rusiye em de Qırım akimleri tarafından informatsion qamaçav ep artqanı aqqında malümat berdi.

Subetniñ baş mevzusı ise Qurultay kün tertibiniñ muzakeresi, bunıñ kibi de halq özüni belgilev meselesinde milliy referendum ötkermek oldı.