Qırımtatar halqınıñ büyük dostu Turan Yazğan aqqında film tanıtıldı

20 November 2012

2012 senesi noyabr 20 künü İ. Gasprinskiy adına cumhuriyet qırımtatar kütüphanesinde türk dünyasında meşur siyasetçi ve erbap, Türk dünyası araştırmaları vaqufınıñ prezidenti, professor Turan Yazğannıñ ayatı aqqında film taqdim etildi.

Tedbirni Qırımtatar qadınlar ligası teşkilâtlandırdı ve keçirdi. Filmniñ müellifi “Krım” DTRK jurnalisti Zure Pinka.

Filmniñ taqdiminde Meclis reisiniñ muavini, Qırım Yuqarı Şurası Daimiy komissiyasınıñ reisi Remzi İlyasov, Qırımtatar qadınlar birleşmesiniñ reisi Safinar Cemileva, Meclisniñ tışqı alâqalar bölüginiñ başı Ali Hamzin, Qadınlar ligasınıñ azaları, kütüphane hadimleri ve cemaatçılıq iştirak etti.

Öz çıqışında Safinar Cemileva film nasıl azırlanğanı aqqında ikâye etti. “Bu film qırımtatar halqınıñ büyük dostu Turan Yazğanğa sayğı ve minnetdarlığımızdır. O, halqımız sürgünlikten evine qaytmaqta ve yerleşmekte olğan eñ ağır vaqıtlarında yardım qolunı uzatqan, bizge daima qoltutqan insandır., dep qayd etti qadınlar birliginiñ reisi. – Halqımıznıñ ğayrıdan tiklenüv işine qoşqan salmaqlı issesini biz iç bir zaman unutmamız”.

Bunıñ kibi de, Safinar Cemilev bildirdi ki, film endi İnternette yerleştirildi ve istegen er kes onı seyir etebilir. Tez vaqıtta ise filmni Amerikadaki diasporamızğa numayış etilecek.

“Turan Yazğan kibi insanlar aqqında bizim yaş nesilimiz mıtlaqa bilmek kerek. Meclis adından men Turan Yazğanğa teşekkür bildirip, ögünde başımnı egem, – dedi Remzi İlyasov. Meclis reisiniñ muavini “Turan Yazğannıñ izinden” filmi mektep programmalarına kirsetilmesini teklif etti.