Qırımtatar halqınıñ aqlarını ğayrıdan tiklev meselesi Gaagada baqıldı

07 September 2012

OSCE ekspertleri Qırımtatar halqınıñ aqlarını ğayrıdan tiklev meseleleri boyunca halqara forumnıñ iştirakçilerine tedqiqat ve tevsiyelerini azırlaylar.

2012 senesi sentâbr 6 künü OSCE Milliy azlıqlar boyunca aliy komissarınıñ ofisinde (Gaaga, Niderlandı) Qırımtatar halqınıñ öz Vatanınla aqlarını ğayrıdan tiklev, Ukrainada onıñ telükesizligi ve inkişafını teminlev meseleleri boyunca halqara forumğa azırlıq çerçivesinde OSCE Milliy azlıqlar boyunca aliy komissarınıñ daveti boyunca olacaq forum iştirakçilerine tedqiqatlarnı keçirmek ve tevsiyelerni azırlamaq içün kelgen ekspertlerniñ muşaveresi ötkerildi.

Ekspertler toplaşuvında Qırımtatar halqı Meclisi reisiniñ birinci muavini Refat Çubarov ve “Qırım inkişafı vaqufı” hayriye teşkilâtınıñ baş direktorı Aleksey Skorik iştirak ettiler.

Muşavere iştirakçilerini OSCE Milliy azlıqlar boyunca aliy komissarı bürosınıñ başı İlze Brands Keris hanım selâmladı.

Bir sıra maruzalar, şu cümleden Refat Çubarovnıñ da Halqara forumnı teşkil etüv yolundaki manialar aqqında çıqışını, diñlegen körüşüv iştirakçileri ekspertler tarafından 2013 senesiniñ başına qadar azırlaycaq tedqiqat ve tevsiyelerniñ suallerini muzakere ettiler. Tedqiqatlarnıñ neticesi olaraq olacaq halqara forum iştirakçileri içün konkret tevsiyeler işlenecek.

Muşavere işinde OSCE Milliy azlıqlar boyunca aliy komissarı bürosınıñ başı İlze Brands Keris, Aliy komissarnıñ mesleatçısı Aleksandr Vinnikov, Aliy komissarnıñ mesleatçısı Vinsent de Graf, tasil meseleleri boyunca ekspert Marina Gurbo, medeniyet ve til meseleleri boyunca ekspert İdil İzmirli, topraq meseleleri boyunca ekspert Velko Mikeliç, vekâletlik ve idare işlerinde iştirak boyunca ekspert Natalya Mirimanova, Birleşken Milletler Komiteti Aliy komissarınıñ Ukrainadaki idaresiniñ vekili Dmitriy Pleçko, içtimaiy-iqtisadiy meseleler boyunca ekspert Greta Veling, BMT Qırımnı inkişaf ettirüv vekâletliginiñ yolbaşçısı Adeline Göne ve bunıñ kibi de OSCE Milliy azlıqlar boyunca aliy komissarı ofisiniñ hadimleri Natalya Sabanadze, Manon Manon de Kürte de iştirak ettiler.