Qırımtatar halqı VI çağırılış Qurultayınıñ delegatları umumiy, musaviy ve doğrudan-doğru saylav aqqı esasında gizli rey berüv yolunen saylanacaqlar 2013 senesi yanvar 12 künü

14 January 2013

Aqmescitte ötkerilgen qırımtatar halqı qurultayınıñ 5-nci sessiyasında “Qırımtatar halqı Qurultayı delegatlarını saylav nizamı” muzakere etilip, tasdiqlandı

5-nci sessiyada milliy qurultayda “Qırımtatar halqı Qurultayınıñ delegatlarını saylav nizamı”nı delegatlar beş saat devamında er bir maddesini tafsilâtlı muzakere etken soñ tasdiqladılar. Meclis reisiniñ birinci muavini Refat Çubarov Nizamnıñ er bir maddesini oqup seslendirgen soñ madde reyge qoyuldı.

Qurultayğa delegatlar saylanmasınıñ yañı tertibini tesis etken mezkür Nizamnıñ 38 maddesi birer-birer baqıp çıqılğan soñ delegatlar Qırımtatar halqı Qurultayı delegatlarını saylav nizamı”nıñ yañı variantını qabul ettiler.

Böyleliknen, qabul etilgen vesiqağa köre saylavda qırımtatar cemaat ve siyasiy teşkilâtlar, em de olarnıñ blokları iştirak etebileler. 250 delegat qarışıq (majoritar-proportsional) sistema boyunca seçilecek. 50 delegat Qırım, Ukrainanıñ Zaporojye ve Herson vilâyetleri, Kiyev şeeri, Özbekistan cumhuriyetini qavrap alğan çoqmandatlı yekâne saylav dairesinden proportsional sistema boyunca qırımtatar cemaat ve siyasiy teşkilâtlardan berilgen saylav cedvellerine köre ötkerilecek. 200 delegat ise Merkeziy Saylav komissiyası Qırım, Ukrainanıñ Zaporojye ve Herson vilâyetleri, Özbekistan cumhuriyetinde teşkil etken bir çoqmandatlı majoritar saylav dairesinde ve Kiyev şeeri em de Kiyev vilâyetini qavrağan bir mandatlı saylav dairesinden saylanacaq. “Nizamnıñ” yañı variantında çoqmandatlı majoritar saylav dairesini 2 delegat saylamaq imkânını berecek qadar büyükleştirmek norması közde tutula.

Qurultay delegatlığına namzetini köstergenler saylavlarnı teşkil etüv ve ötkerüvge göñülli olaraq 250 grivnâ berecek. Teşkilât ve bloklarnıñ parası saylav cedveline kirsetilgen namzetlerniñ sayısına köre olacaq.

Tasdiqlanğan “Nizam” boyunca saylav dairelerinde saylav bir künde keçirilecek.

Qurultay delegatları Merkeziy, daire ve uçastka saylav komissiyasınıñ faaliyeti ve şekillendirilmesiniñ tertibini reglamentirlegen maddelerine ayrıca emiyet berdiler. Olarnıñ şekillendirilmesinde saylav ceryanı subyektleriniñ iştirak etmesi saylavlarnı yüksek teşkiliy seviyede keçirilmesi ve saylav ceryanınıñ açıq, aşkâr olmasını ve reylerniñ neticesini belgilevde obyektivlikni teminleycegine ümüt etile.

Bunıñ kibi de Nizamda saylav komissiyalarınıñ azalarına Qurultay delegatlığına namzet köstermesini yasaqlağan tertip de kirsetildi.

“Nizam” tasdiqlanğan soñ delegatlar 17 adamdan ibaret Merkeziy saylav komissiyasını da tizdiler ve onıñ reisi olaraq Zair Smedlâyev saylandı.

Malümat içün:   2012 senesi iyül 21-22 künleri U çağırılış Qurultaynıñ 4-nci sessiyasında “Qırımtatar halqı delegatlarını saylavnıñ esas printsipleri” muzakere etilgen ve 35 azadan ibaret Merkeziy saylav komissiyası meydanğa ketirilgen edi. Aynı vaqıtta Qurultaynıñ qararı boyunca Mecliske Merkeziy saylav komissiyasınen birlikte delegatlarnı saylav Nizamını işlemek avale etildi. “Nizam”nıñ leyhası Meclisniñ eki toplaşuvında baqılğan soñ onı Qurultay delegatlarınıñ diqqatına taqdim olundı.

Qurultaynıñ sessiyasından bir ay evelsi “Nizam”nıñ leyhası keniş cemaat tarafından muzakere etilmesi içün “Avdet” gazetasında derc olundı, Meclisniñ İnternetteki resmiy saytında yerleştirildi. Leyha boyunca kelgen teklif, tüzetüv ve qoşumcalar teñeştirüv tablitsasına kirsetilip, Qurultay delegatlarına darqatıldı.