Qırımtatar halqı V Qurultayı beşinci sessiyasınıñ delegatları Enver Abduraimovnıñ 1944 senesi sürgünliginde 50 fayızğa qırımtatarlarnıñ özleri qabaatlı degen sözlerini keskin qaraladılar

13 January 2013

2013 senesi yanvar 12 künü Qırımtatar halqı V Qurultayı beşinci sessiyasınıñ işi devamında Meclis reisiniñ muavini Ahtem Çiygoz Enver Abduraimovnı delegatlar sırasından çıqarmaq teklifinde bulundı.

“2013 senesi yanvar 2 künü ATR televizion kanalınıñ “Mızmızlar” programmasında iştirak etken Qurultay delegatı, Qırım Yuqarı Şurası “Qurultay-Ruh” fraktsiyasınıñ azası Enver Abduraimov 1944 senesi sürgünliginde yarı-yarığa qırımtatarlarnıñ kendileri qabaatlılar” dedi”, – diye qayd etti Ahtem Çiygoz.

Qurultay delegatı, Qırım Yuqarı Şurasınıñ deputatı Enver Abduraimovnıñ böyle çirkin çıqışı Qırımnıñ ve onıñ tışında yaşağan çoqtan-çoq semetdeşlerimizni pek açuvlandırdı. Olar bizge muracaat etip, Qırımtatar halqınıñ Qurultayı bu hususta ait qarar almasını talap eteler”.

Qurultaynıñ sessiyasında bulunğan qırımtatar milliy areketiniñ iştirakçileri, Türkiyedeki qırımtatar diasporasınıñ vekilleri, Qurultay delegatları Enver Abduraimovnıñ sözlerini keskin qaralap, onıñ umummilliy qurum erkânından çıqarılmasını talap ettiler. Enver Abduraimovnıñ Qurultay minberinden sorağan afusını çoqları qabul etmegenlerini bildirdiler.

Aynı zamanda Qurultaynıñ bir sıra delegatları Enver Abduraimovnıñ em kütleviy matbuat vastalarında, em qurultay minberinden uzur sorağanını esapqa alıp, meseleniñ muzakeresinen sıñırlanmaqnı teklif ettiler.

Meclis reisi Mustafa Cemilev meseleni sadece muzakere etmekni teklif etip, kelecekte bu, faqat delegat Enver Abduraimov içün degil de, öz vazifesine böyle yengil-yelpi yanaşqan diger qırımtatar siyasetçileri ve cemaat erbapları içün ders olur, dedi. “Böyle tüşünilmeden yapılğan çıqışlarnıñ aqibeti qurultaynıñ er bir delegatı içün ders olması kerek”, – dediler Qurultay delegatları.

Malümat içün: 2013 senesi yanvar 2 künü ATR televizion kanalınıñ “Mızmızlar” programmasında http://atr.ua/pages/programs.aspx?video=2012-12-27-09-44-04-2151957 iştirak etken Qurultay delegatı, Qırım Yuqarı Şurasında “Qurultay-Ruh” fraktsiyasınıñ azası Enver Abduraimov qırımtatarlarnıñ öz-özüni idare etüv milliy organlarınıñ ükümetnen siyasiy işbirlikte bulunmaq zarurlığı hususında fikir bildirir eken, akimiyetniñ qırımtatarlarğa menfiy munasebetini qırımtatarlarnıñ areketlerinen bağlamağa tırıştı. Bundan da ziyade, tarihtan böyle allarnı misal olaraq ketirgende, Abduraimov “1944 senesi sürgünliginde yarı-yarığa qırımtatarlarnıñ kendileri qabaatlılar”, dedi

“1944 senesi kommunistler bizni sürgün etkende bunı öz-özlüginden, kendileri istegeni içün yapmadılar da. Demek, milliy areket ya da milliy siyasetimizde bizni sürgün etmeleri içün areketler yapıldı. Er alda, halqnıñ problemi tışqı faktorlarğa bağlı degil, 50 fayızğa insanlarnıñ özleri suçlı. Menim ömürge liberal yanaşuvım böyle: alâqam oldığı er angi adisede yarı-yarığa qabaatnı öz boynuma alam, çünki buña alâqam bar”, – dedi Enver Abduraimov 2013 senesi yanvar 2 künü ATR televizion kanalınıñ “Mızmızlar” programmasında