Qırımtatar halqı Meclisiniñ reisiniñ adına taziye telegrammaları kele

15 Avgust 2012

Qırımtatar halqı Meclisi reisiniñ adına 2012 senesi avgust 13 künü qaza aqibetinde 10 yaşlı torunı Canike Abdulcelilova vefat etkeni munasebetinen taziye telegrammaları kelmekte.

Cümleden, Türkiye Tışqı işler naziri Ahmet Davutoğlu, Amerika Qoşma Ştatlarınıñ Ukrainadaki Vefqulade ve Vekâletli elçisi Con Tefft ve onıñ refiqası Mariella, Ukraina halq deputatları, devlet ve cumhuriyet akimiyet vekilleri, yaqın arqadaşları ve meslekdeşleri baş sağlığı tilediler.

“Bu facialı vaqıtta bizim oy-fikirlerimiz, dualarımız Siz ve yaqınlarıñız ile olğanını bilmeñizni ister edik”, – dep yazalar öz telegrammalarında Con Tefft ve onıñ refiqası Mariella. Bunıñ kibi de Türkiye qırımtatar dernekleri federatsiyasınıñ vekilleri, Qocaeli qırımtatar derneginiñ reisi İbraim Aracı, siyasetçi Vladimir Şklâr ve “Svoboda” (Praga, Çehiya) radiosı ukrain hızmetiniñ hadimleri de taziyelerini bildirdiler.

“Qıymetli dostumız ve meslekdeşimiz Mustafa, torunıñız Canikeniñ facialı elâqı aqqındaki haberni büyük keder ile eşittik. Alla sizge sabır bersin. Alla qızçıqqa rahmet eylesin! Canike bizim qalplerimizde ebediy saqlanır.

Kiyevden başımıznı eggenimiz alda Öles Şevçenko, Yevgen Sverstük, Vasil Övsiyenko, Levko Lukyanenko, Raisa Rudenko, Öles Sergiyenko,Yevgen Pronük, Grigoriy Kütsenko” – denile ukrain uquqqoruyıcıları ve dissidentleri imzalağan telegrammada.

Bunıñ kibi de telegrammalar Almaniyadan uquqqoruyıcı Garik Superfin, Ermenistandan – Vardan Arutünân, “Memorial” uquqqoruv ve hayriye cemiyeti idaresiniñ reisi Arseniy Roginskiy (Rusiye), Frenkistandan SSSR dissident areketiniñ iştirakçisi Natalya Gorbanevskayadan keldi.

Şimaliy Kavkaz ve qırımtatar halqlarınıñ aqları içün küreşçi Aleksey Kösterinniñ qızı Yelena Kösterina ve Moskvadan Kösterinler ailesi de M. Cemilevniñ adına taziyelerini yolladılar, “Bu yanıqqa dayanmaq pek zor. Lütfen, rica etemiz, daima cesür olğanıñ kibi cesür ol. Qabaatlılarnı qıdırma, sabır et!”, – denile telegrammada.

Qırımtatar halqı Meclisiniñ yolbaşçısı Mustafa Cemilev ve onıñ yaqınları olarğa başsağlığı tilegenlerniñ episine teşekkür bildireler. “Torunım elâkı munasebetinen bildirgen taziyeleriñiz, telqiniñiz içün sağ oluñız”, – dey M. Cemilev.

Qaza aqibetinde Qırımtatar halqı Meclisiniñ 10 yaşlı torunı Canike Amet qızı Abdulcelilova vefat etti. Facia avgust 13 künü Otuz köyünde Canike anna-babası ve ağasınen yaşağan Otuz köyünde yüz berdi.