Qırımtatar halqı Meclisiniñ reisi AQŞ Prezidenti Barak Obamanıñ adına muracaat mektübi yolladı

08 Mart 2014

AMERİKA QOŞMA ŞTATLARINIÑ PREZİDENTİ
Cenap BARAK OBAMAğa

Ürmetli cenap Prezident!

Siziñ yüzüñizde Amerika Qoşma Ştatlarınıñ halqına muracaat etemiz

Qırımtatarlarnıñ tarihiy Vatanı Qırımğa felâket keldi ve bu yarımadanıñ ruslar, ukrainler, qırımtatarlarından ibaret aman-aman eki millionlı ealisi içün qocaman insaniy ve içtimaiy afatqa çevrilebirilir.

Bir aftadan ziyadedir ki Qırımnıñ şeer soqaqları ve yollarından Rusiye ordusınıñ silâlı askerleri ve arbiy tehnikası kütleviy şekilde keçmekte. Qırımnıñ olarğa işanğan bir gruppa mesülietsiz ayırımcı siyasetçileri akimiyetni devirdiler.

Er kün Rusiyeden Qırımğa ep yañı-yañı arbiy qoşunlar keçirilmekte. Qırımda rus arbiyleriniñ sayısı 30 biñni arttı. Olar ukrain ordusınıñ bütün garnizonlarını blok ettiler, ava limanları işğal etilip, Qırımğa kiriş ve çıqış yollarını qapattılar.

Rusiyeniñ Krasnodar ülkesi ve diger vilâyetlerinden büyük-büyük gruppalarnen yarı askeriy teşkilâtlarnıñ azaları olğan “kazaklarnıñ” Qırımda vaziyetni qızıştırmaq maqsadınen kelüvi, tınç ealisi silâsız qalğanı alda “öz-özüni qorçalav” otrâdlarınıñ azalarına silâ darkatıluvı çoqmilletli Qırım ealisini ğayet endişelendire.

Endi üçünci kündir ki Qırımğa OSCE azaları olğan devletlerniñ arbiy közeticilerini kirsetmeyler. Er kün olarnı Qırımğa kirişte silâlı insanlar toqtatalar.
Silâlı insanlar zorbalıq kösterip Birleşken Milletler teşkilâtı Baş kâtibiniñ mahsus elçisi cenap Robert Serrini Qırımdan quvıp çıqardılar.

Ürmetli cenap Prezident!

Bugün bütün medeniyetli dünya Qırımdaki vaziyetniñ qızıştırılması aqibetinde qopabilecek afatnı qorqu ile beklemekte. Qırımnıñ çoqmilletli ealisi – ukrain, ruslar ve qırımtatarları öz balaları, yaqınları ve aqrabalarınıñ ayatı içün qorqu içinde yaşamaqtalar. Er angi bir anda aqibeti tüzetilmeycek bir şey olabilir.

XX asırda Qırım endi bir facianı yaşadı, onıñ aqibetleri alâ bugünge qadar yoq etilmedi. 1944 senesi mayıs 18-de SSSR kommunist rejimi yarımadanıñ tamır halqı qırımtatarlarnı tamamile sürgün etti. Bir künde bizim Vatanımız, evlerimiz ve mal-mülkümiz çekip alındı. Sürgünlikniñ birinci yıllarında Orta Asiya, Ural ve Sibirniñ uzaq bölgelerinde zorluq, açlıq, hastalıq ve azap-uqubetlerden halknıñ 46 fayızı elâk oldı.

Ancaq 45 yıldan soñ biz Vatanımız Qırımğa alıp qaytqan yolğa çıqabildik. Qırımtatar halqınıñ avdeti SSSR dağıtılması ve biz terkibinde yaşadığımız mustaqil Ukrainanıñ tiklenmesi devrine doğru keldi. Qırımtatarlar zorluq çekerek kene öz Vatanına yerleşip, rus, ukrain ve diger millet qomşularınen dostluq ve barışıq müitinde yaşamaqtalar.

Cenap Prezident!

Soñki vaqialar ve Rusiye Federatsiyasınıñ Qırımğa pek çoq silâlı küçleriniñ kirsetilmesinen bağlı daa da ağır aqibetler munasebetinen qırımtatarlar ve olarnıñ rus, ukrain qomşuları halqara cemiyet ve dünyanıñ yetekçi devletleri, bilhassa Amerika Qoşma Ştatlarına büyük işanç ve ümütnen baqalar.
Sizge ve AQŞ ükümetine öz sayğımnı ifade eterek, Qırımnıñ yüz biñlernen sakinleri – qırımtatarlar, ruslar, ukrainlerniñ adından musaadeñiznen Sizge ve diger devlet yolbaşçılarına açıqtan-açıq sual berem:

– Qırımda vaziyet qızıştırılmasını kim toqtatacaq ve Qırım ealisiniñ ömürine telükeniñ ögüni kim alacaq?

– kim ve ne zaman Qırımda arbiyler ve olarnıñ yarıaskeriy teşkilâtlardaki yardımcıları tarafından uydurılğan çatışmalar qopqanı taqdirde olması tahmin etilgen milletine köre temizlevlerniñ ögüni alacaq?

Cenap Prezident!

Eminim ki, bu ve diger bir çoq suallerge cevaplarnı AQŞ, Ukraina ve Rusiye ükümetleri birlikte tapabilirler.

Qırımda yaşağan yüz biñlernen insanlarnıñ ayatlarını saqlap qalmaq içün, barışıq ve adalet oğrunda emince davranıñız.

Sayğılarım ile
Refat Çubarov,
Qırımtatar halqı Meclisiniñ reisi



Aqmescit,

Qırım, Ukraina

2014 senesi mart 8.