Qırımtatar halqı Meclisiniñ «Qırım yarımadasında vaziyetni çezüv aqqında» muracaatı

07 Mart 2014

BİRLEŞKEN MİLLETLER TEŞKİLÂTINA
AVROPADA TEMİNLEV VE İŞBİRLİK TEŞKİLÂTINA
AVROPA KEÑEŞİNE
AVROPA BİRLİGİNE
DEVLETLERNİÑ PARLAMENTLERİ VE ÜKÜMETLERİNE

QIRIMTATAR HALQI MECLİSİNİÑ
“QIRIM YARIMADASINDA VAZİYETNİ ÇEZÜV AQQINDA”
MURACAATI

Qırım ve Qırım etrafında vaziyet ep kerginleşmekte.

2014 senesi mart 6-da Qırım Yuqarı Şurasınıñ “Umumqırım referenlumını keçirüv aqqında” qarar alması ve onı mart 16-da keçirmek qararı Qırım cemiyetinde kerginlik şiddetleşmesiniñ yañı faktorı oldı. Yarımadanıñ çoqmilletli ealisi Qırımğa Krasnodar ülkesi ve Rusiyeniñ diger vilâyetlerinden kütleviy sürette kelgen qazaq teşkilâtlarınıñ vekilleri teşkilâtlandırabilecek keniş kölemli provokatsiyalardan saqınalar.

Yarımadada Rusiye qoşunlarınıñ bulunuvı, jurnalist ve diplomatlarnıñ işine keder etken, Qırımğa ÖBSE közeticilerini kirsetmegen “halq qoruyıcıları”nıñ pek faalleşkeni vaziyet insanlarnıñ ömürine telükeli olması seviyesine köterileceginden delâlet bere.

Yarımadada yaşağan ve angileriniñ ki Qırımnı Ukrainadan ayırmaq siyasetini alıp barğanlarnıñ bir fikirde olmağan ukrainler, qırımtatarlar ve umumen Ukraina grajdanlarına nisbeten zorbalıq kösterilmesi real olabilir. Qırımnıñ bugünki “akimiyeti”niñ siyasetine razı olmağan diger millet insanlarına nisbeten de zorbalıq yapılabilir.

Angi milletke mensüp olğanından qatiy nazar epsi insanlarğa facialı olacaq büyük felâketniñ ögüni almaq ve Meydanğa kelgen vaziyetten barışıq yolnen çıqmaq maqsadında Qırımtatar halqınıñ Meclisi halqara teşkilâtlarğa, devletlerniñ parlamentleri ve Ükümetlerini Qırımğa BMT niñ barış küçlerini kirsetmek imkânını deral baqmağa çağıra.
 

Refat Çubarov
Qırımtatar halqı Meclisiniñ reisi

2014 senesi mart 6.