Qırımtatar halqı Meclisiniñ nevbetteki toplaşuvı

25 January 2013

25 yanvar künü Qırımtatar halqı Meclisiniñ nevbetteki toplaşuvı olıp keçti.

Toplaşuvnıñ başında Meclis azaları al-azırda Aqmescitteki Semaşko adına cumhuriyet hastahanesinde tedaviylengen milliy areket iştirakçisi, Qurultay Teftiş komissiyasınıñ reisi Qurtseit Abdullayevniñ sağlığı aqqında malümatnı diñlediler. Belli olğanına köre, yanvar 24 künü keç maalde bellisiz şahıslar Qurtseit Abdullayevge tecavuz ettiler. “Aqibette Qurtseit Abdullayevniñ başı yaralandı, miyi sarsıldı, yüzünde bir çoq darbe izleri qaldı”, – dep haber etti, Qurtseit Abdullayevni Refat Çubarovnen beraber hastahanede yoqlağan Meclis azası Sinaver Qadırov.

Meclis azaları Qurtseit Abdullayevni köteklegen şahıslar onıñ iç bir şeyine toqunmağanı, demek tecavuz kün evelden planlaştırılğan ve siyasiy tüs taşığanını qayd ettiler. Milliy areketniñ faal iştirakçilerinden biri olğan Qurtseit Abdullayevge yapılğan tecavuz munasebetinen Meclisniñ bu işni taqiq etmek talabınen uquqqoruv organlarına muradcaatı yaqın vaqıtta derc olunacaq.

Meclis toplaşuvında bunıñ kibi de qırımtatar halqı soyqırımı qurbanlarınıñ hatırasına bağışlanğan matem merasimlerini (sürgünlikniñ 69 yıllığı) azırlav ve keçirüv boyunca teşkiliy komitet meydanğa ketirilip, Meclis reisi, Ukraina halq deputatı Mustafa Cemilev yolbaşçılığındaki erkânı da tasdiqlandı.

Qırım, Ukraina, Poloniya ve Beyazrusiye musulmanlarınıñ müftisi, Qırım ükümetiniñ birinci reisi Noman Çelebicihan öldürilgeniniñ 95 yıllığı munasebetinen keçirilecek matem merasimleri planınıñ leyhasını muzakere etüv devamında ait qararlar alındı. Meclis reisiniñ muavini Remzi İlyasovğa matem merasimlerini keçirecek cemaat teşkilâtlarınıñ areketlerini közetmek, bunıñ kibi de Meclis yolbaşçılığında ötkerilecek tedbirlerniñ planını Prezidiumnıñ muzakeresine taqdim etmek avale olundı.

Meclis azaları Merkeziy saylav komissiyasınıñ reisi Zair Smedlâyevniñ Qırım cumhuriyeti, Zaporojye ve Herson vilâyetlerinde yaşağan qırımtatarlarnıñ sayısını tasdiqlav meselesi boyunca çıqışını diñlediler.

Belli ki “Qırımtatar halqı qurultayınıñ delegatlarını saylav nizamı”na muvafıq Meclis cemi memuriy-territorial teşkilâtlarda Qurultay delegatlarını saylamaq içün kvotalarnı esaplamaq içün statistik malümatlarnı tasdiqlaybile. Öz vazifeleri çerçivesinde Meclis azaları bu meselede zarur qararnı qabul ettiler.

Toplaşuvda “Kiyev regional meclisini meydanğa ketirüv aqqında” qarar alınıp, onda Kiyevde oquğan ve çalışqan semetdeşlerimiz bayağı bir çoqluqnı teşkil etkenleri qayd oluna. Mezkür qarar boyunca Yerli meclislerni saylavlarnı azırlav ve keçirüv komissiyasına Kiyevde yerli meclis saylavını teşkil etmek avale etildi.

Kün tertibiniñ “Diger meseleler” bölüginde Meclis reisi Mustafa Cemilev şunı haber etti ki, yanvar 12-de olıp keçken 5-nci çağırılış Qurultayınıñ 5-nci sessiyasından soñ Qurultay delegatları ve çoqtan-çoq semetdeşlerimiz adından tüşken arizalarda kütleviy matbuat vastalarında qırımtatar halqınıñ sürgünligi aqqında aqaretli sözlerni aytqan Qurultay delegatı Enver Abduraimovğa nisbeten alınğan qararnen razı olmağanları qayd etile.

“Meclis reisi aqqını qullanaraq men eñ yaqın zamanda 5-nci çağırılış Qurultayınıñ nevbetten tış oturımını çağırıp, Enver Abduraimovnıñ Qurultay delegatlığından ve Qırım Yuqarı Şurasında “Qurultay-Ruh” fraktsiyasından çıqarılması aqqında teklif kirsetecem, – dedi Mustafa Cemilev. – Qurultay delegatları Enver Abduraimovnıñ areketlerini qaralap, lâkin kütleviy matbuat vastalarında halq ve Qurultayda onıñ delegatları ögünde açıqtan-açıq afu sorağanını köz ögüne alıp yımşaq qarar aldılar. Amma Enver Abduraimov soñra Qurultay delegatı ve qurultay adından saylanğan Qırım Yuqarı Şurası deputatınıñ ant-yeminini bozğan areketlerni yaptı”.

Qurultaynıñ nevbetteki tış sessiyası ötkerilecek kün kütleviy matbuat vastalarında yaqın vaqıtta ilân etilecek.