Qırımtatar halqı Meclisiniñ «Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ hatıra künü tedbirleri aqqında» qararı

08 Avgust 2011

ÖBSE Parlament Assambleyasınıñ 2009 senesi iyül 3-te qabul etken “Bölüngen Avropanı birleştirüv: HH1 asırda ÖBSE regionında insan uquqları ve serbestligini taqdirlev” qararına muvafıq avgust 23 – “Ribbentrop-Molotov” uzlaşması imzalanğan künü Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ hatıra künü olaraq ilân etildi.

HH asırda SSSRde kommunist rejimi tarafından genotsidge oğratılğan qırımtatar halqı ÖBSE PA qararını qırımtatar halqınıñ öz Vatanında aq-uquqlarınıñ ğayrıdan tiklenilmesine bir siltem olaraq qabul ete.

Qırımtatar halqınıñ Meclisi ÖBSE PA qararı esasında ve Avropa halqlarınıñ kommunist ve natsizm rejimlerinde ketirgen qurbanlarınıñ hatırasına 2009 senesinden başlap er yılı avgust 23 künü Aqmescitte çeşit siyasiy ve içtimaiy teşkilâtları vekilleriniñ iştirakinde matem mitingleri keçire.

Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ hatıra künü çerçivesinde matem mitingi 2011 senesi avgust 23-te Salğır bağçası yanında (Yaltinskaya soqağı) qırımtatar halqı sürgünligi qurbanlarına qoyulğan hatıra taşı ögünde ötkerilecek.

Stalinizm ve natsizm qurbanlarınıñ hatırasına matem mitingi keregi kibi teşkilâtlandırılması maqsadında Qırımtatar halqınıñ Meclisi

QARAR BERE:

1. İşçi gruppa aşağıdaki erkânda tasdiqlansın:

ÇUBAROV Refat – Qırımtatar halqı Meclisi reisiniñ birinci muavini, Qırım Yuqarı Şurasınıñ deputatı (İşçi gruppanıñ reberi)

SMEDLÂYEV Zair – Meclis Kâtibiyetiniñ başı (İşçi gruppa reisiniñ muavini)

OVÇARUK Vasiliy – Ukrain milletçileri kongressi Qırım teşkilâtınıñ reisi (İşçi gruppanıñ azası, razılığınen)

PİLUNSKİY Leonid – Ukraina Halq Areketi (RUH) Qırım ülke teşkilâtınıñ reisi, Qırım Yuqarı Şurasınıñ deputatı, (İşçi gruppanıñ azası, razılığınen)

FOMUŞKİN Öleg – Ukraina halq partiyası Qırım teşkilâtınıñ reisi (İşçi gruppanıñ azası, razılığınen)

HAMZİN Ali – Meclis tışqı alâqalar bölüginiñ başı(İşçi gruppanıñ azası, razılığınen)

ENNANOV Ruslan – Meclis azası, Aqmescit regional meclis reisiniñ vazifesini eda etici (İşçi gruppanıñ azası)

2. İşçi gruppağa:

– Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ hatıra kününe bağışlanğan matemi mitingini keçirüv tertibi boyunca Qırım cemaatçılığına muracaatnı azırlamaq ve kütleviy informatsiya vastalarında derc etmek;

Müddeti 2011 senesi avgust 15-ke qadar

– matem mitingi keçirilmesi içün zarur teşkilâtiy tedbirlerni teminlemekni avale etmek.

Qırımtatar halqı Meclisiniñ toplaşuvında qabul etildi
2011 senesi avgust 7.
Aqmescit ş.