Qırımtatar halqı genotsidi qurbanlarınıñ hatırasına Bütünqırım matem mitinginiñ qararı

18 Mayıs 2012

Qırımtatar halqı genotsidi – 1944 senesi mayıs 18 sürgünligi ve on yıllarnen ğurbette zorluqnen tutuluv qurbanlarınıñ hatırasına bağışlanğan Bütünqırım matem mitinginiñ qararı

68 yıl evelsi 1944 senesi mayıs 18 künü Qırım toprağında insanlıqqa qarşı, Qırımnıñ asıl halqı ve insaniyetniñ özgün halqlarından biri olğan qırımtatar halqını yoq etmek maqsadını közde tutqan cinayet yapıldı.

68 yıl evelsi 1944 senesi mayıs 17-den-18-ge keçer gecesi Qırımnıñ bütün eali noqtalarında NKVDnıñ 32 biñden ziyade silâlı askerleri ve subayları bir kereden qırımtatarlarnı sürgün etüv işini başladılar. Yarımadanıñ er taraflarından demiröl stantsiyalarına taba qadınlar, bala ve qartlarnen tolu yük maşinaları kelip, halqnı mal taşığan vagonlarğa toldurdılar.Silâlı askerlerniñ bekçiliginde eşelonlar qırımtatarlarnı belgisizlik, Vatandan uzaqta ölümge alıp ketti.

Qırımtatarlar sürgünligi ve yabancı illerde ta 80-nci yıllarğa qadar zorluqnen tutuluvınıñ deşetli aqibetleri bugünge qadar devam ete ve alâ daa yoq etilmedi. Halqnıñ Vatanğa qaytarıluv ceryanı daa soñuna çıqmadı, biñlernen qırımtatarlar alâ daa sürgünlik yerlerinde yaşamaq zorundalar.

Ğayıp ve misilsiz meşaqatlar esabına qaytıp kelgenlerniñ 260 biñinden çoqluğı ise öz ailelerini yerleştirmekniñ eñ sade şartlarından bile mahrumlar.

Ukraina mustaqilligi ilân etilgen soñra 20 yıllıq devir içinde qırımtatar halqı aq-uquqlarını ğayrıdan tiklev, öz tuvğan toprağında yerleşmek ve saqlanıp qalmasını teminlegen iç bir qanun qabul etilmedi. Aksine Ukrainada qırımtatarlarnıñ qaytması ve yerleşmesini daa da beterleştirgen manialar qoyulıp, olarnıñ adaletke işançı ve aqları tanılmasına soñki ümütlerini çekip ala.

Böyle devam etmez!

Devlette qırımtatar halqına nisbeten maqsadlı, açıq ve namuslı siyaset yoqluğı iç bir sebepnen aqlanılmaz. Qırımtatar halqınıñ kelecegi, onıñ millet olaraq Vatanında öz-özüni belgilemek imkânı akimiyet başına keçip. Ukraina ve onıñ topraqlarında yaşağan halqlarnı qayğırmağan siyasetçilerniñ keyf ive isteklerine bağlı olamaz!

2010 senesi mayısta olıp keçken Bütün qırım matem mitingi iştirakçileriniñ iradesini yerine ketirgeni alda Qırımtatar halqınıñ Meclisi soñki eki yıl devamında öz faaliyetini qırımtatar halqına ve Ukraina devletine şu halqnıñ qaytarılması, yerleştirmesi ve aqlarını tiklemesine yardım etüvge halqara cemaatçılıqnı celp etüvge doğrultmaqta.

Bunda biz, Qırımtatar halqı genotsidi – 1944 senesi mayıs 18 sürgünligi ve on yıllarnen ğurbette zorluqnen tutuluv qurbanlarınıñ hatırasına bağışlanğan Bütünqırım matem mitinginiñ iştirakçileri, bugün de şundan kelip çıqamız ki, stalin rejimi alıp kelgen genotsid, insan aqları taptalması, insanlıqqa qarşı cinayetlerni başından keçirgen avropa devletleri birleşip, Ukrainağa şu cinayetlerniñ qurbanı olğan qırımtatar halqını qaytarmaq, öz toprağında serbest inkişaf etmesini teminlevde yardım ete bilirler.

Qırımtatar halqınıñ Meclisi bu vazifeni becerirken, 2011 senesi oktâbr ayında Birleşken Milletler Teşkilâtı, Avropa Şurası, Avropada telükesizlik ve işbirlik teşkilâtı, Avropa, Kanada, AQŞ ve Türkiye kibi yetekçi devletlerniñ vekillerini Kiyevde topladı. Toplaşuv iştirakçileri Meclisniñ qırımtatar halqı aqlarınıñ öz Vatanında ğayrıdan tiklenmesi, Ukrainada havfsızlığı ve inkişafınıñ kefilligini teminlev meselesi boyunca halqara Forumnı keçirüv teşebbüsine qoltuttılar.

Öz nevbetinde Avropada telükesizlik ve işbirlik teşkilâtınıñ milliy azlıqlarnıñ işleri boyunca Aliy komissarı Ukraina Prezidenti. Ukraina Yuqarı Şurası ve Nazirler Kabineti adına qırımtatar halqınıñ qaytuvı, yerleşmesi ve aqlarınıñ ğayrıdan tiklemesine yardım etmek maqsadını közde tutqan mahsus halqara programmanı işlemek boyunca ait tekliflerini yolladı.

Ukraina ve qırımtatar halqına genotsid aqibetlerini yoq etüvde yardım etmege azırlığını bildirgen halqara teşkilâtlar, devletlerniñ ükümetlerine minnetdarlığımıznı bildirip, Ukraina Prezidenti, Ukraina Yuqarı Şurası ve Nazirler Kabinetini birleşip, halqara cemaatçılıqnıñ iştirakinde 2012 senesi qırımtatar halqı aqlarınıñ öz Vatanında ğayrıdan tiklenmesi, Ukrainada havfsızlığı ve inkişafınıñ kefilligini teminlev meselesi boyunca halqara Forum keçirilmesini teminlemege çağıramız.

Biz, Bütünqırım matem mitinginiñ iştirakçileri, sürgünlik yerlerinde elâk olğan biñlernen qırımtatarlarnıñ, Vatanğa qaytmaq aqqı içün küreşken milliy areket faaleriniñ hatırasını saqlayaraq, öz halqımız ve Qırımnıñ kelecegi içün mesülietimizni añlağanımız, halqara cemaatçlılıqnıñ yarldımı ve qoltutuvına tayanğanımız alda Qırım tamır halqınıñ aqlarını tolusınen tikleycek Ukrainanıñ demokratik, serbest inkişafına irişmek qararındamız.

Qırımtatar halqı genotsidi – 1944 senesi mayıs 18 sürgünligi ve on yıllarnen ğurbette zorluqnen tutuluv qurbanlarınıñ hatırasına bağışlanğan Bütünqırım matem mitinginde qabul etildi.