Qırımtatar halqı genotsidi qurbanlarınıñ hatırasına bağışlanğan umumhalq matem tedbirleriniñ tafsilâtlı planı tasdiqlandı

16 Aprel 2012

2012 senesi aprel 16-da regional meclislerniñ reisleri ve qırımtatar cemaat teşkilâtlarınıñ iştirakinde olıp keçken Qırımtatar halqı Meclisiniñ kenişletilgen toplaşuvında Meclis muzakeresine qoyulğan esas meselelerden biri 1944 senesi mayıs 18-de sürgün etilgen ve onlarnen yıllar ğurbet illerde zorluqnen tutulğan Qırımtatar halqı genotsidi qurbanlarınıñ hatırasına bağışlanğan umumhalq matem tedbirleriniñ keçirilmesi edi.

Mezkür meseleniñ muzakeresinde Qırımtatar halqı Meclisiniñ 2012 senesi mart 4-te tizilgen Teşkiliy komitet azaları da iştirak ettiler.
Teşkiliy komitet adına tüşken çoqtan-çoq teklifler baqıp çıqılğan soñ Meclis azaları tedbirler planını tasdiqlap, keçirilecek er bir tedbir içün mesülietli şahıslarnı pekittiler. Bunıñ kibi de mayıs 18 künü Aqmescitniñ merkeziy meydanında Bütünqırım matem mitingi iştirakçileriniñ kolonnalarını tizüv tertibi ve areketleriniñ yolları da tasdiqlandı.

Aqmeçit ve Aqmescit regionlarında yerli meclis azalarını saylavlarnıñ neticeleri baqıp çıqılğan soñ Meclis qararı boyunca regional konferentsiyalarnı keçirüv müddeti belgilendi. Mezkür qararğa binaen aprel 28-de Aqmeçit regional meclisiniñ erkânı tasdiqlanacaq ve reisi saylanacaq. Aqmescit regional meclisiniñ bu meseleler boyunca konferentsiyası mayıs 12-de olacaq.

Meclis toplaşuvında qırımtatarlarnıñ qurulğan mesken evlerini qullanuvğa teslim etüv, bunıñ kibi de daa qurulıp bitirilmegen evlerni qanunlaştıruvnen bağlı vesiqalarnı azırlav hususında yazğan pek çoq muracaatları da baqıldı.

Toplaşuvğa davet etilgen Qırım Nazirler şurası reisiniñ muavini Aziz Abdullayev ve Cumhuriyet milletler komitetiniñ reisi Edem Dudakov köterilgen meselelerniñ çezimi içün zarur vesiqalarnı azırlavğa talaplar aqqında malümat berip, toplaşuv iştirakçileriniñ suallerine cevaplandılar.
Çıqışta bulunğan Meclis azaları ve cemaat teşkilâtlarınıñ vekilleri qurulıp bitmegen biñlernen evlerde yaşağan qırımtatarlarnıñ leyhalarnı azırlav ve diger, pek çoq masraflar talap etken, vesiqalarnı azırlamaları imkânsız olğanını qayd ettiler.

Mezkür mesele muzakeresiniñ neticeleri boyunca bir afta içinde Ukraina Nazirler şurasına Ukraina ükümeti qabul etken normativ vesiqalarğa acele sürette kirsetilmesi zarur olğan konkret teklifler beyan etilgeni alda muracaat azırlamaq qararı alındı.

Meclis tolplaşuvında “narazılıq tarlaları” vekilleriniñ aprel 18-de kütleviy miting ve piketler keçirüv ricası beyan etilgen muracaatları baqıldı. Akimiyet organları şu tarlalarda turğan insanlarğa topraq ayıruv meselesini ep kerige çekkenleri sebebinden bu insanlarnıñ sabır-taqatı tükene bilir, dediler Meclis toplaşuvında bulunğan “narazılıq tarlaları”nıñ temsilcileri. “Daa bir yıl keçmekte, bizim ailelerimiz içün qurucılıqnı başlap olamaylar. Qurucılıq malzemeleri ep paalılaşa, biz ise temel qoyıp başlamaq degil, yer bile alamadıq”, – denile muracaatta.

Bu mesele qızğın bir şekilde muzakere etilgen soñ “narazılıq tarlalar” vekilleri Meclis azalarınıñ kütleviy aktsiyalarnı Qırım Nazirler şurası Topraq komissiyasınıñ toplaşuvı ve komissiya reisinen körüşüvge qadar kütleviy aktsiyalarnı keçirmemek teklifine razı oldılar. Belki bu körüşüvlerde meydanğa kelgen vaziyet boyunca er tarafnı qanaatlendirgen bir qarar alınabilir.

Topraq komissiyasınıñ azaları Refat Çubarov ve Zevcet Qurtümerovğa yaqın künlerde bu körüşüvni keçirüv künü, yeri ve tertibi aqqında Qırım nazirler şurası reisiniñ muavini Georgiy Psaröv ile añlaşmaq avale etildi. Toplaşuv devamında Qırımtatar halqı Meclisi ve qırımtatarlarnıñ öz-özüni idare etüv milliy organlarınıñ ağımdaki faaliyetine dair bir sıra diger meseleler de baqıldı.