Qırımtatar gençleri kene Çatırdağda

14 Mayıs 2012

2012 senesi mayıs 13 künü Qırımda Qırımtatar halqı sürgün etilgenineñ 68 yıllığına bağışlanğan “Çatırdağ – 2012” hatıra aktsiyası keçirildi.

Çatırdağ etegindeki Anğara keçitinde biñden ziyade adam 1527 metrlik töpelikni zapt etmek içün toplandı.

Hatıra aktsiyası endi üçünci kere Qırım Milliy küreş federatsiyası prezidentiniñ muavini Seydamet Yağyayev teşebbüsi ve Qırımtatar halqınıñ Meclisi em de Bütündünya qırımtatarlar kongressiniñ qoltutuvı ile ötkerilmekte.

Bu sene aktsiyada Qırımtatar yaşlar merkezi, “Bizim Qırım”, “Emel”, “Qardaşlıq”, “Yaşlar şurası” kibi çeşit qırımtatar gençler teşkilâtlarınıñ vekilleri, bunıñ kibi de universitet ocaları, studentleri, Qırımnıñ çeşit yerlerinden kelgen oca ve talebeler iştirak etip, eñ gençi 8 yaşında, eñ qartı ise – 89 yaşında edi.

Çatırdağ seferiniñ iştirakçilerine muvafaqiyetler tilemek içün Meclis reisiniñ birinci muavini Refat Çubarov, Meclis Kâtibiyetiniñ başı

Zair Smedlâyev ve Qırım Milliy küreş federatsiyası prezidentiniñ muavini Seydamet Yağyayev keldiler.

“Bizler içün bu aziz yerlerde qırımtatar milliy bayraqları tiklenecegi ne qadar güzel, – başladı öz hayırlavını Refat Çubarov. – Daa nasıldır 25-30 yıl biz bu aqta taasvur bile etmedik, milliy simvolikamız yasaq altında edi. Soñki yıllarda bizde acayip bir anane peyda oldı – er sene gençlerimiz yarımadamıznıñ eñ aziz yerlerinden biri olğan Çatırdağğa seferge çıqalar.

Yaşlar anda sürgünlikte elâk olğan ve ğurbetlikten öz yurtuna öyle de qaytıp kelmegen merhumlarımıznıñ ruhuna dua oquylar. Bu işiñiz içün sağ oluñız. Er sene sizlerge yüzlernen yañı-yañı insanlar qoşula”.

Ebet, dağnıñ töpesine köterilgenlerniñ ekseriyeti gençler olsa da, aktsiyağa üyken nesil vekilleri de qoşuldılar. Olar öz istegi ve ve iradesinen yaşlarğa göñül berdiler.

Seydamet Yağyayev sefer iştirakçilerine sabır-taqat tiledi. “Biz kene beraber toplandıq ve er yıl saflarımız kenişlemekte. Sürgünlik qurbanlarını Çatırdağnıñ töpesinde añmağa istegenler ep çoqlaşa” – dedi S. Yağyayev.

Çatırdağnıñ deñiz sathından 1527 metr yükseklikke köterilgen aktsiya iştirakçileri sürgünlikte açılqtan-horluqtan elâk olğanlarnıñ ruhuna dua oqup, soñra “Ant etkenmen” milliy gimnni beraber yırladılar.