«Qırımnıñ tarihiy-medeniy mirası» leyhası çalışıp başladı

26 Mart 2012

2012 senesi mart 24 künü Qırımtatar halqı Meclisiniñ reisi Mustafa Cemilev Qırımğa “Qırımnıñ tarihiy-medeniy mirası” leyhasını ömürge keçirüv çerçivesinde teşrif buyurğan bir gruppa türkiyeli alimlerni Meclis öfiisinde qabul etti.

Türkiye delegatsiyasını belli tarihçı, Añaradaki “Bilkent” universitetiniñ professorı Haqan QIRIMLI, doktor Nicole Nur KANÇAL, İstanbul universiteti, Türkiye Cumhuriyeti Nazirler şurası Çeteldeki türklerniñ işleri boyunca departamenti yanında Balqanlar ve Şarqiy Avropa devletleriniñ koordinatorı Memet QILIÇ, bunıñ kibi de Türkiye Cumhuriyeti Nazirler şurası Çeteldeki türklerniñ işleri boyunca departamentiniñ hadimleri Yeliz OZ, Veysel GÜZDÜZ, Tarihiy abidelerniñ restavratsiyası boyunca Türkiye vaqufları baş idaresiniñ hadimleri Gökçe GÜNEL i Gülşen DİŞLİ temsil ettiler.

Körüşüvde Meclis reisiniñ birinci muavini Refat Çubarov, Meclis tışqı alâqalar bölüginiñ başı Ali Hamzin, Meclis reisiniñ Türkiyenen alâqalar boyunca mesleatçısı İsmet Yüksel ve “Bizim Qırım” Halqara gençler teşkilâtınıñ reisi Abduraman Egiz iştirak ettiler.

“Qırımnıñ tarihiy-medeniy mirası” leyhasınıñ kerçekleştirilmesi içün, – dedi Haqan Qırımlı, – Türkiye ve Qırımda tarih, ilim, sanatşınaslıq, mimarlıq, resim saasında çalışqan mütehassıs ve ekspertlerden ibaret yüksek professional gruppa şekillendirildi. Leyha çerçivesinde qırımtatar halqınıñ saqlanıp qalğan tarih ve medeniy abideleri ögrenilecek. Araştırma işlerniñ bütün basqıçları resim ve videoğa çekilecek. Delegatsiyanıñ eki basqıçtan ibaret işleriniñ neticesi olaraq fotoekpozitsiyanıñ azırlanması ve ekspeditsiya renkli katalogınıñ neşir etilmesi közde tutula”.

Bundan da ğayrı, leyha iştirakçileriniñ esas maqsadı – qırımtatar halqı tarihiy-medeniy abideleri ğayrıdan tiklenilmesine yardım etüv, mimarlıq yadikârlıqlarınıñ bugünki vaziyetini belgilev ve türkiy halqlar arasında Qırım hanlığı devrine ait ulu mirasnıñ ğayrıdan tiklenilmesi zarurlığı hususındaki fikirni tarqatmaqtır.

Qırımtatar halqı Meclisiniñ reisi Mustafa Cemilev Türkiye Cumhuriyeti Nazirler şurası Çeteldeki türklerniñ işleri boyunca departamentine qırımtatar halqı içün bu qadar müim ve zarur olğan “Qırımnıñ tarihiy-medeniy mirası” leyhası içün teren minnetdarlığını bildirdi. “Qırımtatar halqı uzun yıllar devamında ğayıp etilgen öz mirasını direm-direm toplamaqta, – Mustafa Cemilev.- Bugün qardaş türk halqından ameliy yardım alğan qırımtatarlar tarihiy asabalığımız ve nesiller hatırasını ğayrıdan tiklev oğrundaki areketleriñizge pek yüksek qıymet keseler”.