Qırımlı siyasetçilerniñ Qırımnı Ukrainadan ayırmaq tahmini aqqındaki fesatçı beyanatlarından telâşlanğan semetdeşler Meclis ofisi yanında toplaştılar

21 Fevral 2014

2014 senesi fevral 21-niñ sabasından Qırımtatar halqı Meclisiniñ Şmidt soqağı, 2-nci evde yerleşken merkeziy ofisi yanında Qırımnıñ Aqmescit, Bağçasaray, Saq, Qarasuvbazar ve diger rayonlarından Qırım parlamentiniñ reisi V. Konstantinovnıñ Qırımnı Ukrainadan ayırmaq tahmini aqqındaki fesatçı beyanatlarından telâşlanğan semetdeşler toplaştılar.

Meclis reisi Refat Çubarov toplanğanlarnıñ qarşısına çıqıp, Qırımdaki vaziyetke operativ seslengenleri içün teşekkür bildirdi. “Bugün Mecliske kelgen ve Vatan içün telâşlanıp, yardımını teklif etken er bir semetdeşimizden minnetdarmız, – dedi Refat Çubarov.

Bundan soñ Meclis reisi toplaşqanlarğa tünevin aqşam olıp keçken adiseler aqqında malümat berdi. “Tünevin aqşam Qırım Yuqarı Şurasınıñ “Qurultay-Ruh” fraktsiyasından ğayrı, epsi deputatlarını Yuqarı Şuranıñ sessiyasına güya Ukrainadaki vaziyetniñ muzakeresine davet ettiler. Amma bugün Meclisniñ ve bazı ferasetli qırımlı siyasetçilerniñ areketleri sayesinde sessiya yerine Regionlar partiyasınıñ toplaşuvını keçirmek qararlaştırıldı.

Toplaşuvğa başqa fraktsiyalarnıñ deputatlarını da davet etip, “Qurultay-Ruh” fraktsiyası azalarını kene çağırmadılar, – dedi R. Çubarov. – Qırım parlamentiniñ reisi V. Konstantinovnıñ Moskvada yapqan çıqışları bizni pek raatsızlay. Lâkin halqımız böyle beyanatlarnıñ kerçekleşmesine yol bermez. Ve sizler mında, Meclisniñ yanında bulunğanıñız da büyük rol oynadı”.

Meclis reisi bunıñ kibi de semetdeşlerni fevral 23 künü saat 13.00-de Aqmescitniñ merkeziy meydanında Noman Çelebicihan hatırasına bağışlanıp keçirilecek matem mitingi aqqında soy-soplar, dost-eşler ve yalıñız qırımtatarlarnı degil de, diger millet ve din mensüplerine de hatırlatmalarını rica etti.

“Bir sıra Qırımtatar cemaat teşkilâtlarınıñ Meclis reberliginde er yılı Noman Çelebicihan hatırasına bağışlanıp keçirilgen mitingde iştirak etmemek kibi beyanatlarına baqmadan, biz er bir vatanperver, er bir milletperver insanğa fevral 23 künü Aqmescitniñ merkeziy meydanına kelip, öz halqınıñ aqları içün küreşken ve 1918 senesi bolşevikler qolundan öldürilgen ulu küreşçimizni añmaq, bunıñ kibi de Qırım sakinleri Ukraina mustaqil devletniñ birligini bozmağa yol bermeyceklerini bildirmek içün kelmege çağıramız, – dedi Refat Çubarov.