Qırımdan Türkiyege Ahmed İhsan Qırımlınıñ cenazesine qırımtatar delegatsiyası Meclis reisi yolbaşçılığında ketti

13 Dekabr 2011

2011 senesi dekabr 11 künü Türkiyede 92 yaşında Türkiyede Qırımtatar medeniyeti ve yardımlaşma cemiyetleri umumiy merkeziniñ reisi, Türkiyeniñ belli cemaat ve devlet erbabı, “Ukraina-Türkiye” cemiyetiniñ prezidenti Ahmed İhsan Qırımlı vefat etti.

Ahmed İhsan Qırımlınıñ dekabr 13 künü olacaq cenazesine qırımtatar delegatsiyası Meclis reisi Mustafa Cemilevniñ yolbaşçılığında Qırımdan Türkiyege uçıp ketti.

Delegatsiya erkânına Bütündünya qırımtatarlar kongressiniñ prezidenti Refat Çubarov, Türkiye Cumhuriyetiniñ Aqmescitteki fahriy konsulı Seyran Osmanov, Meclis reisiniñ mesleatçısı İsmet Yüksel, “Krım” devlet teleradiokompaniyası qırımtatar yayınlar icadiy birleşmesiniñ direktorı Seitislâm Kişveyev, “Bizim Qırım” halqara gençler teşkilâtınıñ başı Abduraman Egiz kirdi.

Ahmed İhsan Qırımlınen vedalaşuv merasimi 2011 senesi dekabr 13 künü Ankarada Türkiye Cumhuriyeti Parlamenti binasında keçirilecek. Cenaze naması da dekabr 13 künü Qocatepe camisinde qılınacaq.

Ahmed İhsan Qırımlı dekabr 14 künü Balıkesir şeerindeki mezarlıqta defn etilecek.