Qırımdaki yañı “milletleştirüv” dalğası, arbiy bir cinayettir – uquq qorçalayıcılar

07 Noyabr 2022

İşğal etilgen Qırımdqa ruslarnıñ başlağanları yañı “milletleştirüv” dalğası, arbiy bir cinayettir. Qırım.Aqiqatqa tefsir etkende QırımSOSnıñ uquqçısı Anastasiia Kalinina bu aqqında haber berdi.

– Kerçekten de bu vaziyet, Qırımnıñ böyle degen sıñırğa yaqın bölgelerinde ecnebiylerge topraqqa saip olmağa yasaqlanmağa beñzey. Ukrain qanunlarına mücibi, bu tür areketlerniñ iç bir quveti yoq. Em de halqara gumanitar uquqqa (şu cümleden, 1949 s. Cenk vaqtında grajdan ealiniñ qorçalanması aqqında IV. Cenevre Şartnamesine) mücibi, başqa tarafnıñ mülkini zapt ya da viran etüv, acele arbiy kereklik degil, arbiy cinayettir, – dep Anastasiia Kalinina añlattı.

Ukrain qanunlarına mücibi, vaqtınca işğal etilgen Qırımda rus akimiyetiniñ er bir aktı ve qararınıñ quveti yoq ve uquqiy tarzda keçmegen ve faydasız sayıla. Mülkü qanunsız olaraq alınğan Ukraina vatandaşları, arbiy cinayetni qayd etmek içün, Ukraina prokurorlığına hitap ete bilirler.

Keçenlerde Qırımda işğal akimiyeti, ukrain biznesleriniñ böyle degen “mobilizatsiya”sını başlattı. Bundan ğayrı, yarımadanıñ işğal memuriyetiniñ böyle degen başı Serhiy Aksönov, Ukraina vatandaşlarınıñ em de şahsiy mülküni “milletleştirmege” teklif etti.