Qırımdaki işğal politsiyası, qırımtatar faalcilerini “ihtar”nen ziyaret etti

30 Dekabr 2022

_{Foto: Qırım bilrdemligi}

İşğal etilgen Qırımdaki politsiya, qırımtatar faalcileriniñ evlerine kelip, olarğa “resmiy ihtarlar”nı bildirdi.

“Qırım birdemligi” içtimaiy birleşmesi bu aqqında haber berdi.

– Aynı zamanda Qırımnıñ farqlı bölgelerinde bir qaç kişi “Qırım birdemligi”ne haber berdi ki, politsiya hızmetçileri olarnı ziyaret etip, qanunlarnı bozmamaları içün olarğa ihtar bildirdiler, – beyanatta yazıldı.

Böylece qayd etildi ki, quvetçiler, Seyitler rayonında Ebazer İslamov ve Eskender Celalov, Aqmescit rayonında Elmaz Akimova, Sudaq şeerinde Seitosman Qaraliyev kibi qırımtatar faalcisini ziyaret ettiler.

“Resmiy ihtar” olaraq körüngen vesiqada bildirildi ki, politsiya hızmetçileri, rf CMQniñ 19.3 maddesine (politsiya hızmetçini boysunmama) atıf eterek, faalcilernen “qanunlarnı bozmamaq ve olarnı mesüliyetke çekmek içün” qorçalayıcı subet ettiler. 

Elmaz Akimova añlattı ki, politsiya hızmetçilerinen beraber “reberliginiñ, bazı insanlarnıñ yaşağanları yerlerni teşkermek emrini yerine ketirem” dep aytqan “E” Merkeziniñ işçisi onıñ yanıña keldi.

Seitosman Qaraliyev, politsiyanıñ ziyaretini “daa bir qorqutıcı areket” olaraq tanıy ve bunı qırımtatarlarnıñ siyasiy mabüslerni destek etmelerinen bağlana.

Haber berildi ki, keçenlerde işğalciler Ebazer İslamovnı mesüliyetke çektiler, oña İnternette bir post içün para cezası berildi.

2021 senesi qırımlı musulmanlarnıñ davasınıñ halq ögündeki ceryanına Eskender Celalov alınmadı, bundan soñ “içtimaiy toplaşuvnı keçirüv ceryanını bomzaq” içün oña ceza berildi.

Elmaz Akimova, politsiya ve prokurorlıqtan mitinglerde iştirak etmesi içün bir qaç kere ihtar aldı. 2018 senesi Bağçasaray şeerinde “Hansaray” tarihiy-medeniy kompleksi yanında bir kişilik numayış keçirgen soñ politsiyağa ketirildi.

Seitosman Qaraliyev, qırım makemelerinde qanunsız olaraq tutulğan faalcilerniñ aqlarını qorçalağan içtimaiy qorçalayıcıdır.