Qırımdaki işğal makemesi ukrain türkülerinen qırımtatar toyunıñ 6 iştirakçisini cezalandırdı

14 Sentâbr 2022

Rusiyeniñ kontrol etkeni Bağçasaray rayon makemesi, onıñ ‘ukrain milletçileriniñ cenk yırı’ adlandırğanı ‘Çervona kalına’ (‘Qırmızı qanser’) türküasini çalğanlarına köre toynıñ teşkilâtçıları ve iştirakçilerini memuriy mesüliyetke celp etti. Radio.Svoboda makemeniñ matbuat hızmetine atıf eterek bu aqqında haberdar ete.

– Memuriy masüliyetke celp etken kişilerge 50 biñ rubleli ştrafnen ve 5-15 künlik memuriy tevqifnen çeşitli cezalar tayin etildi, – dep Rusiyeniñ kontrol etkeni makeme haberdar etti..

Anda toynıñ teşkilâtçıları ve iştirakçileri ‘Ukraina Millitçileriniñ Teşkilâtınıñ (UMT) yapqanı faaliyet Rusiye Federatsiyasınıñ topraqlarında ekstremist olaraq tanınğan ve yasaq etilgen atributlar (arbiy türkü) olğan, ihtisaslarnıñ neticelerine mücibi, ukrain türküsini kösterüv’ ceryanı içün qabaatlandırıldı.

Bundan ğayrı, rus qabaatlandırıcıları ve makemesine köre, toynıñ iştirakçileri bu türküni diñleyerek, rus ordusınıñ Ukrainadaki areketlerini ‘itibardan tüşürdiler’.

Haberdar etilgenlerge köre, memuriy masüliyetke umumen altı kişi celp etildi. Olarnıñ adları belli olmay. Makemeniñ saytında Ahtem Gemeciniñ rus ordusınıñ ‘itibardan tüşürüv’ ve ‘nefret ve duşmanlıq doğurtuv’ aqqında maddelerge masüliyetke celp etilmesi aqqında malümat bar. Telegram kanalları Gemecini toynıñ diceyini adlnadırdılar.

Rus devlet ‘Krım 24’ agentliginiñ bilgilerine köre, eñ şiddetli ceza – 15 künlik tevqif – Bağçasaraydaki toynıñ olğanı ‘Arpat’ restoranınıñ saibine berildi. Toynıñ diceyi ve bir qadın iştirakçisi 10 künlik, kiyevniñ anası – 5 künlik, 18 yaşından kiçik olğan balaları olğanları içün kelinniñ anası ve ‘Arpat’nıñ saibiniñ apayı ise 50 biñ rubleli bir para cezası berildi.

Keçenlerde haber etildi ki, rus politsiyası Bağçasaraynıñ sakini Elvira Abdullayevağa qarşı eki protokol yazdı. O, ukrain türkülerini çalğanı ‘Arpat’ qavehanesindeki toynıñ kiyeviniñ aqrabasıdır.

Bundan evel haber berildi ki, Bağçasaraynıñ rus akimiyeti sentâbr ayınıñ 10-unda ukrain türkülerini çalğanı ‘Arpat’ restoranını ‘teşkermek içün’ qapattı.

Bundan ğayrı, Qırımdaki rus akimiyetniñ tarafını alğan telegram kanalları türküni çalğan dicey Ahtem Gemeciniñ halq ögündeki afusınen bir video yayınladılar.

Sentâbr ayınıñ 14-ünde qırım restoranınıñ saibiniñ ’afu’nen bir video peyda oldı.