Qırımda Ural-Altay Pen-klubınıñ konferentsiyası ötkerilecek

15 Iyün 2012

2012 senesi iyün 18-den 21 –ine qadar Aqmescitte Ural-Altay Pen-klubınıñ IV-nci Halqara konferentsiyası ötkerilecek.

Konferentsiyanı Halqara PEN-klub yanında Hayser Abdurasul Ozgun prezidentligindeki Uyğur PEN-merkezi teşkilâtlandıra.

Konferentsiya iyün 18 künü saat 9. 30-da Bağçasarayda “Larişes” Qırım tarihiy müzeyinde açılacaq.

2012 senesi iyün 19-da Aqmescitteki “Moskva” musafirhanesiniñ küçük muşavereler zalında Ural-Altay Pen-klubınıñ IV-ncı Halqara konferentsiyasınıñ yeküniy qararı qabul etilecek.

Konferentsiyanıñ açılışında selâmlav ve maruzanen Halqara PEN-klub Prezidenti Con Ralston Soul çıqışta bulunacaq. Bunıñ kibi de konferentsiyada Finlândiya, Qırğızstan, Qazahistan, Tatarstan, Estoniya, Macaristan ve diger devlet Pen-klubları reisleriniñ iştirak etmesi beklenile.

Şunı da hatırlatmalı ki, 2012 senesi mart 24 künü Uyğur PEN-merkez prezidenti Hayser Abdurasul Ozgunnen körüşken Meclis reisi Mustafa Cemilev Qırımda Ural-Altay tilleri ailesine kirgen halqlarnıñ icatkârlarını birleştirecek Ural-Altay Pen-klubınıñ IV-ncı Halqara konferentsiyasını keçirüv teşebbüsine qoltutqan edi.

Malümat içün:  PEN-klub — çeşit edebiyat janrlarında çalışqan yazıcı ve jurnalistlerni birleştirgen ükümetten tış halqara teşkilâttır. Onıñ maqsadı bütün dünya yazıcılarınıñ icat etmesine qoltutuv olıp, teşkilât apste tutulğan, siyasiy rejim tarafından basqı altında bulunğan yazıcılarğa yardım bermek, bediiy tercime ustalığını inkişaf ettirmektir.