Qırımda Ukraina vatandaşı “qırımtatar batalyonı”nda iştirak etkeni içün maküm etildi

03 Mart 2023

Rusiyeniñ kontrol etkeni Canköy rayon makemesi, ukrainalı “Noman Çelebicihan adına qırımtatar batalyonı”nda iştirak etkeni içün beş senege maküm etti. Makemeniñ matbuat hızmetine atıf eterek, Qırım.Aqiqat bu aqqında haber berdi.

– Makeme, sadeleştirilgen sebeplerge köre davanıñ bilgilerini tafsilâtlıca ögrenip, RF CQniñ 208. maddesiniñ 2. qısmına (“Federal qanunda esapqa alınmağan silâlı teşkilâtta iştirak”) mücibi adamnı qabaatlı olaraq tanıdı ve ilk sene apishanede keçirip, daa dört sene müstemlekede keçirmege maküm etildi, – ilânda yazıldı.

Açıq menbalarğa mücibi, maküm etilgen adamnıñ adı Halilov İhor Valeriyovıç. KHVnıñ yazğanına köre, keçken sene oraq ayınıñ 21-inde Geniçesk rayonınıñ Salkove köyünde adamnı tuttılar – bundan soñ başında çuval taqıp, Aqmescitteki SİZOğa ketirdiler.

Keçenlerde vaqtınca Geniçeskte Canköy rayon makemesi rus quvetçileriniñ tutqanları Ukraina ADQniñ yedeginiñ zabiti Oleksiy Kıselövnı 8,5 senege maküm etti.