Qırımda sovet uquqqoruyıcılarınıñ halqara konferentsiyası keçirilecek

16 Mayıs 2012

Qırımtatar halqı sürgün etilgeniniñ 68 yıllığı ve soyqırım qurbanlarınıñ hatırasına bağışlanğan tedbirler sabıq sovetler hududında demokratiya inkişafında müim ve adden tış bir vaqianen belgilenecek. Mayıs 19 künü Aqmescit şeerinde dissident ve sovet uquqqoruyıcılarınıñ körüşüvi olacaq.

Bu, insanlıqnı yoq etüv saasında şu qadar vahşiy ve misilsiz SSSR kommunist rejimine qarşı küreşte soñsuz meşaqatlarnı çekken, zorluqsız areketleri sayesinde rejimni iç bir qurşunsız darma-dağın etken sovet siyasiy mahbüslerniñ körüşüvidir.

Halqımız içün eñ facialı sınav yılları olğan 20-nci asırnıñ 60-70-nci senelerinde sovet imperiyası qırımtatarlarnıñ halq olaraq saqlap qalınması ve Vatanğa qaytmaq istegi içün repressiyalarğa oğratqan vaqıtta qırımtatarlarğa şu sistemağa qarşı küreşte dissidentler ve uquqqoruv areketi qoltutqan edi.

Bugünde-bugün bizim minnetdar halqımız, onıñ vekâletli organı olğan Meclis, qırımtatar cemaatçılığı ve milliy areket saflarına eminliknen qoşulğan yaş nesilimiz Qırımda öz musafirleri – sovet uqukqoruyıcıları ve dissidentlerni büyük sayğı ve itiram ile qarşılamaqta.

Olarnıñ arasında dünyaca belli Vladimir BUKOVSKİY (İngiltere), Lüdmila ALEKSEYEVA, Sergey KOVALÖV, Aleksandr LAVUT, Aleksandr PODRABİNEK, Aleksey SMİRNOV (Rusiye), Tatyana YANKELEVİÇ, Andrey GRİGORENKO (AQŞ), Natalya GORBANEVSKAYA (Frenkistan), Yevgen SVERSTNÜK, Miroslav MARİNOVİÇ, Vasil ÖVSİYENKO, Öles ŞEVÇENKO, İosif ZİSELS (Ukraina), Petr HLEBOVİÇ (Poloniya) ve digerleri.

Milliy matem ve qayğı künü Amerikadan Qırımğa qırımtatarlarnıñ daa bir qoruyıcısı – Corc Vaşington universiteti siyasetşınaslıq professorı Piter REDDAVEY da kele. Belli ki, aynı onıñ ğayreti ile 1976 senesi Amsterdamda çıqqan “Taşkent mahkemesi” kitabı sayesinde bütün dünya qırımtatar halqınıñ facialı taqdiri, milliy areket iştirakçilerine qarşı tazıyıq aqqında bildi. Poloniyadan öz aqları içün küreş alıp barğan qırımtatar halqı milliy areketini tedqiq etken genç alimler ve uquqqoruyıcılar keldiler.

Nufuzlı musafirlerniñ ziyaret programması ğayet tolu. Bir qaç körüşüv ve subetlerden soñ olar mayıs 19 künü esas mesele – yani şu seneniñ küzinde Qırımda sovet uquqqoruyıcılarınıñ halqara forumını, ya da daa bir tekliflerge köre Uquqqoruyıcılarınıñ Qırım forumını keçirmek meselesini muzakere etecekler.

Bugünde-bugün sabıq sovetler hududında sovet imperiyasını restavratsiya yapmaq areketlerine beñzegen vaqialar yüz bergende, Avropa demokratik degerlikler kene de sovet devrindekisi kibi yabancı, dep ilân etilgende, açıq ve adaletli saylavlar yerine sahte seçimler ötkerilgende zemaneviy demokratik ve uquqoruv küçler bu telükege qarşı Praga baariniñ “Siziñ ve bizim serbestligimiz içün” şiarı altında kene birleşmeleri kerek.
Mustafa Cemilevniñ teşebbüsine qoltutqan, lâkin kendilerine bağlı olmağan sebeplerden ötrü kelip olamağan Leonid Plüşç Frenkistandan ve diger dissidentler Qırımdaki tedbirleri iştirakçileriniñ adına mektüp yollağan.
 

Qırımtatar halqı Meclisiniñ Tışqı alâqalar bölügine