Qırımda Saq rayonınıñ Cağa Quşçu köyünde yañı cami açıldı

Saq rayonınıñ Cağa Quşçu köyünde dekabr 6 künü yañı cami açılışına bağışlanğan tantanalı merasim ötkerildi. Cami “Alraid” birleşmesi ve Qırım musulmanları diniy idaresiniñ yardımı ile quruldı. Qurucılıqnıñ resmiy sponsorı “Bayt az Zakât” hayriye teşkilâtıdır.

Tantanalı merasimde Meclis reisi Refat Çubarov, Qırım musulmanlarınıñ müftiyi acı Emirali Ablayev, Qırım Nazirler şurası reisiniñ muavini Aziz Abdullayev, Qırım Yuqarı Şurasınıñ deputatı Valeriy Grineviç, “Alraid” birleşmesiniñ reisi Muhammed Taha, Saq rayon memuriyetiniñ reisi Aleksandr Övdiyenko, Saq rayon şurasınıñ reisi Nikolay Rossolovskiy, Saq regional meclis reisi Eskender Bilâlov ve yerli sakinler iştirak ettiler.

Adeti üzre merasimnı duanen acı Emirali Ablayev başlap, hayırlav sözünde cami qurucılığında iştirak etkenlerniñ episine minnetdarlıq bildirdi. Müftiy yañı caminiñ imamı Amadiy Ümerovğa beş nusha Quran-ı Kerim kitabını bağışlap, cübbe kiydirdi.

“Diger ibadethaneler kibi er ay camiler de açıla. Amma siziñ köyde cami ve kilse yan-yanaşa tura, – dedi Refat Çubarov. İç şübem yoqtır ki, eñ yaqın vaqıtta cami ve kilse turğan yer yalıñız bu köy sakinleri içün müim bir yer olıp qalmaz, köyden keçip ketkenler de bu yerde toqtar, ve bu yer aqqında bilirler. Öyle oldı ki, biz daa biraz vaqıt beraber yaşamağa ögrenmek kerekmiz.

Bu bugün yaşağan insanlarnıñ qabaatı degil, bu bizim baba-dedelerimiz yaşadıqlarından qalğan asabalıqtır”. Bunıñ kibi de Meclis reisi bozmaq qolay, amma qurmaq mürekkepçedir, dedi. “Bugün siz mında yaratasıñız, bizden soñ kelecek nesil içün qurasıñız, Bu ise pek müimdir”, – dedi R. Çubarov.

Meclis reisi Refat Çubarov cami qurucılığında ve yanında qurulayatqan kilseniñ tiklenmesinde issesi olğan er keske Qırımtatar halqınıñ Meclisi adından teşekkür bildirip, bunıñ kibi de “Alraid” birleşmesiniñ reisi Muhammed Taha, Saq rayon memuriyetiniñ reisi Aleksandr Övdiyenko, Saq rayon şurasınıñ reisi Nikolay Rossolovskiy ve Qırım Yuqarı Şurasınıñ deputatı Valeriy Grineviçke teşekkür sözlerini ayttı.

Merasimge toplanğanlarnı bu quvançlı vaqianen Saq ve Kezlev regionlarınıñ baş imamı Emirasan Ümerov, Saq ve Kezlev regionları din cemiyetiniñ reisi

Seitasan Asanov, Saq regional meclis reisiniñ vazifesini eda etici Eskender Bilâlov, Cağa Quşçu köy şurasınıñ başı Tatyana Polişçuk ve regional ve yerli meclis, din cemiyetleriniñ azaları hayırladılar.

Aleksandr Övdiyenko, öz çıqışında, “bu yer maneviy barışıq merkezi olıp, mında kelgen adamlar nasıl dostane-muabbet yaşamaq kerekligini ögrenirler”, dedi.

Saq rayon memuriyeti ve Saq rayon şurasınıñ reisleri cami qurucılığınıñ bütün iştirakçilerini fahriy yarlıqlarnen taqdirleyerek, cami içün tozütar bahşış ettiler. Milliy Meclis, Saq regional meclisi ve “İnkişaf” teşkilâtı em de Saq rayon memuriyetiniñ Milletlerara munasebetler ve sürgün etilgen grajdanlarnıñ işleri boyunca bölükniñ başı Aliye Veysovanıñ adından yañı caminiñ imamına cami içün üç kilim bahşış berildi.

Qırmızı şeritni kesmek ve caminiñ qapısını açmaq şerefine Qırım musulmanlarınıñ müftiyi acı Emirali Ablayev, Meclis reisi Refat Çubarov, “Alraid” birleşmesiniñ reisi Muhammed Taha, Saq rayon memuriyetiniñ reisi Aleksandr Övdiyenko, Saq rayon şurasınıñ reisi Nikolay Rossolovskiy nail oldılar.

Tantanalı merasimden soñ yañı camide Qırım musulmanları müftiyiniñ imamlığında birinci cuma namazı qılındı. Soñra tedbir iştirakçilerini sıcaq aş ve tatlılarnen sıyladılar.

Camideki merasimden soñ Meclis reisi Refat Çubarov yanında qurulayatqan kilseni de ziyaret etti. Valeriy Grineviç oña pravoslav ibadethanesi aqqında malümat berdi.

Şunı hatırlatmalı ki, cami “Alraid” birleşmesi, saq regional meclis, yerli din cemiyeti, Qırım Yuqarı Şurasınıñ deputatı Valeriy Grineviç, yerli iş adamları Elvir Bratkeviç ve Murat Sayfullinniñ yardımı ile quruldı.