Qırımda qırımtatar faalcisi İlver Ametovnıñ evi tintildi

06 Fevral 2023

Vaqtınca işğal etilgen Qırımda Sudaq bölgeli meclisniñ başı İlver Ametovnıñ evi tintildi.

Qırımtatar Milliy Meclisiniñ başı Refat Çubarov bu aqqında haber berdi.

– Sudaq şeerinde Sudaq bölgeli meclisniñ başı İlver Ametovnıñ evine rus azapçıları apansızdan kirip tinttiler, – dep Çubarov qayd etti.

O haber berdi ki, tünevin tahminen saat 19ʼda tinmege başladılar ve saar 20ʼge qadar bitirdiler. Onıñ sebebi İlver Ametovnıñ evinde sanki cinayet yapıldı dep beyanatınen, 044nen başlağan nomeradan sanki anonim telefon etildi.

– İşğal etilgen Qırımda rus azapçılarınıñ, qırımtatarnıñ evlerine qanunsız kirmeleri ve anonim telefon etüv esasında tintmeleri pek tarqatılğan. Kerçekten de, telükesizlik federal hızmetiniñ işçileri “telefon çalmaları”nı tüşünip çıqarırlar, – dep Çubarov qayd etti.

Qırımtatar faalcisi Elmaz Akimova Facebookta yazdı ki, fsb, omon, taqiqatçı eyyeti, Kefe ve Sudaq şeerleriniñ politsiyasınıñ tahminen 40 işçisi tinttiler. Tintüv aqqında qarar bermediler.

Akimovanıñ bilgilerine köre, Kefeniñ rus politasiyasınıñ aytqanlarına köre, tintüvlerniñ sebebi 044 Kıyiv nomerasından politsiya bölügine kelgen telefon çalması oldı.

– Telefon etken ve politsiyağa İlver Ametovnıñ evinde cinayet olğanı aqqında sanki haber bergen kişi – “bu adreste qayd etilgen oğlu, apayını öldürdi”. Kelip, elbette olar böyle bir şey tapmadılar. Evni ve oğlunıñ apayınen lafını tinttiler, evniñ bütün odalarınıteşkerdiler, er şeyniñ fotolarını çıqardılar. Er şey yahşı olğanını ögrengen soñ, işçiler İlver ağanıñ evinden kettiler. Hatırlatam ki, soñ 10 kün devamında bu, İlver Ametovnıñ eviniñ ekinci tintilmesidir, – dep Akimova haber berdi.

İlver Ametov, Sudaq bölgeli meclisniñ başıdır. 2019 senesi berim (sentâbr) ayındaki tintüv vaqtında siyasetçiniñ ev müzeyinden eski silâ alındı. O, 20 senedir artefaktlarnı kollektsioniler.