Qırımda Petr Grigorenkonıñ hatırasını añdılar

21 February 2013

Fevral 21 künü Aqmescitte P. Grigorenko adına (Sovetskaya) meydanda qırımtatar ve ukrain cemaatçılığı Pötr Grigorenko eykeline gülçemberler qoydılar.

Milliy Meclis qoltutuvında Qırımtatar milliy areketi veteranları tarafından teşkil etilgen tedbir qırımtatarlarnıñ yaqın dostu, Ukrain Helsinki gruppası tesisçilerinden biri,belli uquqqoruyıcı general Pötr Grigorenko vefat etkeniniñ 26 yıllığına munasebetinen ötkerildi. Bu aqta Krimskotatarske pitannâ online haber ete.

Tedbirniñ başında eykelge çeçekler qoyuldı, soñra toplanğanlarnıñ ögünde milliy areket iştirakçisi Zampira Asanova, Meclis reisiniñ birinci muavini Refat Çubarov, Ukraina Milletçiler kongressi Qırım bölüginiñ reisi ve digerleri çıqışta bulundılar.

Öz çıqışında Refat Çubarov qırımtatarlar Pötr Grigorenoknıñ birlikli olıp, öz aqlarını soramaq degil de talap etmek kerek, degen vasiyetini unutmadılar, dedi.

Çubarov dissidentniñ “Eger sizni aldasalar, kelecegiñiz olmaz” degen sözlerini de hatırlattı. Lâkin bugünde-bugün akimiyet qırımtatar halqını parçalamaq oğrunda areket ete, dep qayd etti Qırım Yuqarı Şurasında “Qurultay-Ruh” fraktsiyasınıñ başı Refat Çubarov.