Qırımda Milliy areketniñ iştirakçisi Anafş Abdul-Cemil oğlu vefat etti

Aqmescit rayonı Kün-Tuvğan (sahte adı Teplovka) köyünde yaşağan Milliy areketimizniñ faal iştirakçisi, Anafi Cemil devamlı hastalıqtan soñ bu faniy dünyanı terk etti.

Anafi ağa, 1990-ncı seneleriniñ başlarında Qırımda milliy idare qurumımıznı meydanğa ketirilmesine öz sezerli issesini qoşqan insanlardandır.

O, özü de Milliy Qurultayğa bir qaç kere mebus (delegat) saylandı, öz köyünde çoq yıllar yerli milliy idare qurumı-ocağınıñ nümüneli ve becerikli reislerinden oldı.

Kütleviy avdet ve yerleşüv yılları cemaatnen muvafaqiyetli çalışıp, onı köy meselelerini çezilmesinde birleştirmege, umumiy işlerge celp etmege bildi. A. Cemil öz safdaş-yardımcıları ile, misal içün, köyniñ musulman qabristanınıñ, mahsus yarış neticesinde, Qırımda eñ abadanlaşqan, temiz ve tertipli, dep tanılmasına nail olğan edi…

Anafi Abdul-Cemil oğlu 1940 senesi 28-sentâbrde, o zaman Fraydorf, bugünde Cürçi (Pervomay) rayonınıñ Boz (sahte adı Tihonovka) köyünde doğdı. Amma, belli ki, bu namlı qorantanıñ tamırları-mekânı Sudaq rayonınıñ Ayserez köyüdir.

1944 s. cinaiy sürgünlik neticesinde Cemilevler Özbekistannıñ Andijan vilâyetine tüştiler. Soñra Sır-Darya vilâyetine köçtiler. Anafi ağa student gençliginden Qırımtatar milliy areketine qoşuldı. Öz tasil-bilgi seviyesi üzerinde çoq çalıştı. Bu ceetten o, qardaşı – keççerek belli milliy erbabımız Mustafa Cemilge de belli bir tesirde bulundı.

Mektep mezunı Anafi, Taşkentte demiryol müendisler institutına kire, onı bitire ve seviyeli leyihacı-mütehassıs oldı. Bir qaç vaqıttan soñ onı qocaman ve nufuzlı “Glavtaşkentstroy” teşkilâtına işke aldılar. Onıñ bivasta iştirakinen, Taşkentni yaraştırğan, şu cümleden, devlet tsirkniñ leyihası azırlandı.

Bunıñnen beraber, A. Cemil, Qırımtatar milliy areketiniñ faali olaraq, gizli toplaşuvlardan ve açıq aktsiyalardan çette turmay, çeşit vesiqalar azırlanmasına qoşula, halqımıznıñ vekillerine qarşı soñu olmağan mahkemelerge qatnay, siyasiy mabüslerimizge qoltuta…

1989 senesi Anafi ağa Qırımğa qaytıp, Kün-Tuvğan köyünde temelli yerleşip, bu cemaat işlerini Vatanda devam etti, itibarlı yerli yetekçilerden oldı.

Ana tilimiz, milliy tasil, medeniy inkişaf, diniy meselelernen bağlı işlerge keniş cemaatımıznı celp etmek yolunda çoq ğayret etti. Aqmescitte 1990-2000 seneleri ötkerilgen ve insan, toplum olaraq aq-uquqlarımıznı tiklenilmesinen bağlı siyasiy tedbirlerge daima qoşulıp keldi.

Bıltır baarde qırcıman 56 yaştaki onıñ pelvan oğlu – klassik küreş boyunca sport ustası, köyde sayğı qazanğan oca İsmet bey ağır hastalıqtan keçingeni – babası içün, ebet, büyük coyuq ve, atta, yıqıcı bir darbe oldı…

Anafi ağanı bilgen meslekdeşleri, tanığan cümle insanlarnıñ hatırasında o, iradeli, bükülmez vatanperver, ğaye tolu teşebbüsçi, samimiy milletsever, yüksek tasilli mütehassıs, dünyabaqışı keñ, tabiatı alçaqgöñülli, külerüzlü, sıralı-sabırlı, qorantasına sadıq insan sıfatında yaşaycaqtır.

Anafi Abdul-Cemil oğlu vefat etkeni munasebetinen onıñ ömür arqadaşı Dilâra aptege, qızı Günseli hanımğa, torunlarına, ağası Asan ağa Cemilge, tatası Vasfiye aptege, qardaşları Mustafa ağa Cemilge, Gülizar ve Dilâra hanımlarğa, cümle yaqınları ve aqrabalarına teren taziye bildirip, baş sağlığı ve tükenmez sabır tileymiz.

Merhum Allah Taalânıñ rahmetinde bulunsın.

____________________

Qırımtatar Milliy Meclisiniñ azaları

Qırımtatar Milliy Qurultaynıñ ve Qırımtatar Milliy areketiniñ bir guruh mebusları ve iştirakçileri, dostları, safdaşları, bir soy köydeşleri.

__________________

Kyiv – Bağçasaray – Aqmescit

14 iyül 2024