Qırımda işğalciler, Ukrain medeniy merkeziniñ faalcisiniñ evisini tinttiler

17 Fevral 2023

İşğal etilgen Qırımda rus işğalcileri, Ukrain medeniy merkeziniñ (UMM) faalcisi Halına Balabannıñ evisini tinttiler. UMMnıñ faalcisi Olena Popova bu aqqında haber berdi, dep Radio Svoboda leyhası Qırım.Aqiqatnı bildirdi.

Popovanıñ bilgilerine köre, Balabannıñ 2018 senesi “VKontakti” içtimaiy ağında vazifesi içün “aşırıcılıq teşkilâtınıñ temsillerini haql ögünde kösterüv”ge dair memuriy dava çerçivesinde evini tinttiler. Tintüvden tamam soñ onı Rusiyeniñ kontrol etkeni Aqmescit şeerindeki Kıyiv rayon makemesine ketirdiler. Anda onıñ memuriy protokolını baqtılar.

Olena Popovanıñ bildirgenlerine köre, Balabanğa eki biñ rublelik para cezası berdiler ve cep telefonını aldılar. Oña dair memuriy davanıñ tefsilâtları belli olmay.

Qırımdaki Ukrain medeniy merkezi, siyasiy bir teşkilât olmay. O, 2015 senesi yarımadada ukrain medeniyetini saqlamaq ve rağbetleştirmek maqsadınen faalciler tarafından teşkil etildi. Aynı zamanda Merkezniñ iştirakçileri çoq kere tesir astında bulundılar: uquq qorçalayıcı organlardaki soravlarğa ve subetlerge çağırdılar, aşırıcılıq aqqında qorqutıp tenbiyelediler. 2017 senesi quvetçiler, Ukrain medeniy merkeziniñ liderlerinden biri Leonid Kuzminni qorqutqan ve basım etken soñ o, yarımadadan ayırmağa mecbur qaldı.

2018 senesi çiçek ayında Aqmescit şeeriniñ rus prokurorınıñ yardımcısı, Qırımda Ukrain medeniy merkeziniñ faalcileri Olena Popova ve Polha Pavlenkonı subet etmege çağırdı. Prokurorcılıqnıñ işçisi, Merkezniñ işinen ve “Qırım kögemi” gazetasınen meraqlandı. Faalciler, özleri ve yaqınlarına qaşrı şaatlıq etmemek aqqını qullandılar.

2018 senesi berim ayında medeniy merkezniñ faalcisi Olha Pavlenko Qırımdan çıqtı. Bundan bir kün evel TFH onıñ evini tintti. Şu anda Olena Popova ABde yaşay.