Qırımda işğalciler içtimaiy jurnalist İrına Danılovıçqa üküm çıqardılar

28 Dekabr 2022

_{Foto: Qırım ceryanı}

Qırımdaki rus makemesi, içtimaiy jurnalist ve emşire İrına Danılovıçnı yedi senege maküm etti, dep «Qırım ceryanı» uquq qorçayalıcı leyhası haber berdi.

Makeme, RF CQniñ 222.1. «Patlayıcı maddeler ya da patlayıcı aletlerni qanunsız satın aluv, satuv, saqlanuv, taşınuv, ketirüv ya da yanında aluv» maddesinde esapqa alınğan cinayet içün qadınnı qabaatlı olaraq tanıdı.

Epis müddetinden ğayrı, 50 biñ rublelik para cezasını ödemeli. Maznunğa ükümni añlap añlamağanını sorağanda jurnalist menfiy olaraq cevap berdi, dep «Qırım ceryanı» qayd etti.

Danılovıç içün rus prokurorlığı 7 sene ve 60 biñ rublelik para cezasını rica etti.

Keçenlerden Danılovıç soñ sözüni ayttı. O qayd etti ki, Rusiye FSBniñ «sahteleştirüv pis uslları»nı qullanğanı ilk kişi olmay. Bundan ğayrı, Qırımnıñ 2014 senesinden berli tutulğan sakinleriniñ adlarını yayınladı. Şu cümleden, Qırımnıñ işğaliniñ ilk qurbanı olaraq sayılğan Reşat Ametovnı hatırladı. İrına Danılovıç bildirdi ki, bu tür kişilerden cedvelniñ kenişleycegini bekley.

Keçenlerde makemede İrına Danılovıç, rus quvetçileriniñ tutqanından soñ işkencelerni qullanmalarını bildirdi.

Şu anda jurnalist, patlayıcı maddeler ya da patlayıcı aletlernen qanunsız areketlerde (Rusiye Cinaiy qanunnamesiniñ 222.1. maddesiniñ 1. qısmı) şübelene.
Haber berildi ki, Rusiye FSB İrına Danılovıçnı tibbiy inelernen patlayıcı aletni azırlaması içün qabaatladı.