Qırımda işğalciler, Herson şeeriniñ sakinini Çelebicihan adına batalyonda iştirak etmesi içün qabaatlaylar

13 Dekabr 2022

Dekâbr ayında Canköy işğal “rayon makemesi”, Herson vilâyetiniñ Novooleksiyivka köyüniñ ukrainalı olğan sakini Konstântın Tereşçenkonı, “Noman Çelebicihan adına göñülli batalyonda iştirak etmesi” içün 4 sene ve 3 ayğa maküm etti.

Qırımtatar maaliy merkezi Facebook saifesinde bu aqqında haber berdi.

– Rusiye Federatsiyasınıñ bu tür siyaseti, işğal etilgen Qırımdaki vatandaşlarnıñ siyasiy fikirlerine qarşı küreş köstergiçidir, – dep QMM qayd etti.

Qırımtatar maaliy merkezi, davanıñ iştirakçisiniñ ükümini lâğu etmege ve başqa siyasiy mabüslerni acele tarzda azat etmege talap ete.

2014 senesinden başlap Qırımtatar maaliy merkezi qayd etti ki, Noman Çelebicihan adına göñülli batalyonda iştirak etmesi içün endi 21 kişi tutulıp qapatıldı: 6 – işğal etilgen Qırımda, (2022 senesi fevral ayınıñ 24-ünden soñ) 15 – işğal etilgen Herson vilâyetinde.