«Qırımda insan aqları ve serbestligi aqqında» Qırımtatar halqı Meclisiniñ muracaatı

20 Mart 2014

Sayğılı semetdeşler!
Sayğılı Qırımnıñ epsi milletlerge mensüp sakinleri!

Bizim Qırım toprağımızda milletimiz, diniy, siyasiy ve diger dünyabaqışlarımızdan qatiy nazar, er birimizge toqunğan vaqialar olmaqta. Allahnıñ bağışlağan eñ qıymetli degerligi özgün halqlardan ibaret insanlıqnıñ unikalligi ve çeşitligi ve bunıñ kibi er bir insannıñ hayatıdır.

Bugün, epimiz içün ğayet mürekkep bir vaziyette müimden-müim vazifemiz Qırım toprağında barışıq ve tınçlıqnı saqlap qalmaq, Qırım ealisiniñ telükesizligi kefaletini teminlemek, çoqmilletli Qırım cemiyetinde özara işanç ve işbirlikni pekitmektir. Aynı zamanda şunı da qayd etmeli ki, transportta, tükân, oquv müessiseleri ve diger cemaat yerlerinde qırımtatarlarnı qorqutuv ve basqı alları ep artmaqta.
Bu munasebetnen Qırımtatar halqınıñ Meclisi epsi regional ve yerli meclislerge insannıñ degerligini aşalağan, maneviy ve cismaniy basqı, şahsiy mülkni çekip aluvnen qorquzuv ve diger zulumlıq areketlerni qayd etmekni avale etti.
Qanunğa zıt bu areketlerniñ er biri mıtlaqa seslendirilecek ve halqara uquqqorçalav teşkilâtlarına haber etilecek. Areketlerniñ er birine uquq noqtai nazarından qıymet kesilip, qabaatlılar halqara qanun normalarına köre cevapkârlıqqa çekilecek. Meydanğa kelgen vaziyette yarımadada insan aqları ve serbestligi içün mesüliet Qırımda qurulğan akimiyet organları ve olarnıñ vazifedar şahıslarına yüklene.
Qırımda zorbalıqnıñ er angi allarınıñ ögüni almaq maqsadında Qırımtatar halqınıñ Meclisi mesülietli taraflarnı:

– militsiya organlarını vatandaşlar aqları ve serbestligi, qanuniy menfaatları, şahsiy telükesizligini teminlemege, qanun bozuvlarnıñ ögüni almağa ve toqtatmağa, cemaat tertibini qorçalamağa, cinayetni açmağa ve olarnı yapqan insanlarnı qıdırmağa, yol areketiniñ havfsızlığını teminlemege, qabaatlılarnı cezalamağa ve memuriy cöremege oğratmağa;

– militsiya ve diger uquqqoraçalav organlarınıñ vazifesini qanunsız şekilde özlerine alğan insanlarnıñ qurumlarını silâsızlandırmağa ve dağıtmağa çağıra.

Qırım akimiyeti ve Qırımnıñ tamır halqı olğan qırımtatar halqınıñ özara munasebetleri Birleşken Milletleor Teşkilâtınıñ tamır halqlarnıñ aqları aqqında deklaratsiyanıñ (2007 s.) normalarına esaslanmalı.
Bunıñ kibi de Qırım akimlerini Qırım Yuqarı Şurasınıñ 2014 senesi mart 11-de qabul etken № 1208/30-10 “Qırımtatar halqı aqlarınıñ ğayrıdan tiklenilmesiniñ ve onıñ Qırım cemiyetine qatılmasınıñ kefaletleri aqqında” qararnıñ amelge keçirilmesini teminlemege çağıramız.

Qırımtatar halqınıñ Meclisi devlet akimiyetiniñ epsi organları, uquqqorçalav ve mahkeme organları, müessise, teşkilât ve işhanelerniñ yolbaşçılarına muracaatta bulunıp, yerlerde epsi işçi ve hadimlerniñ öz professional vazifesini eda etmesini teminlemege, siyasiy basqı allarından vazgeçmege çağıramız.

Refat Çubarov,
Qırımtatar halqı Meclisiniñ reisi

2014 senesi mart 20.