Qırımda Ğeniç şeerinde hırsızlanğan qırımtatar kişisi 6,5 senege maküm etildi

18 Oktâbr 2022

Qırımdaki rus makemesi, qırımtatar kişisi Artur Memetşayevnı 6,5 senege maküm etildi. Aprel ayında işğal etilgen Ğeniç şeerinde onıñ hırsızlanması aqqında belli oldı, dep Qırım.Aqiqat haber berdi.

“Krıminform” rus devlet agentligi, rus taqiqatlığına atıf eterek, Memetşayevni, Rusiyede “terrorcı bir teşkilât” olaraq tanınğan “Noman Çelebicihan adına batalyonınıñ askeri” adlandırdı.

Rus taqiqatlığınıñ fikrine köre, Artur Memetşayev “2016 senesi Noman Çelebicihan adına batalyonğa qatıldı, sıñırğa yaqın topraqlarda naqliyatnı teşekere edi”. Bundan ğayrı, rus quvetçileri inandıralar ki, maküm etilgen adam öz başına sanki “Qırımğa qaçamağa qarar berdi ve anda TFHniñ sıñır idaresiniñ işçileri tuttılar”.

2022 senesi aprel ayınıñ 11-inde rus quvetçileri işğal etilgen Ğeniç şeerindeki qırımtatar Artur Memetşayevniñ evi tinttiler. Bundan soñ faalcilerniñ bilgilerine köre, adamnı belli olmağan yerge alıp ketirdiler.

– Qırılğan arqa camnen ve Z arfınen beyaz miniverde arbiy urba kiyingen silânen insanlar, 1989 senesi doğğan Memetşayev Artur Aliyovıçnı belli olmağan yerge zonen alıp ketirdiler. Tamır qırımtatar halqınıñ temsilcisiniñ bulunğanı yer alâ daa belli olmay. Qayd etemiz ki, Artur evli ve 6 balası bar. Olarnıñ 5-i 18 yaşından kiçiktir, – dep “Qırımtatar Maaliy Merkezi” haber berdi.

Memetşayevniñ rus makemesiniñ makümine dair halq ögünde tefsiri yoq.