Qırım Yuqarı Şurasınıñ deputatı Remzi İlyasov 2013 senesi iyül 22 künü Aqmescit soqaqlarından Stalin portretinen keçken adamlarnı mesülietlikke çekmekni talap ete

24 Iyül 2013

Milliy Meclis reisiniñ muavini, Qırım parlamentiniñ deputatı Remzi İlyasov Qırım Prokuraturasına deputat muracaatını yollap, onda 2013 senesi iyün 22 künü Aqmescit soqaqlarından Stalin portretinen keçken adamlarnı mesülietlikke çekmekni talap ete

Şunı hatırlatmalı ki, iyün 22 künü Aqmescitniñ Gagarin bağçasında Ukrainada Cenk qurbanlarınıñ hatıra ve matem künü munasebetinen Bellisiz asker abidesine çeçekler qoyuldı.

Tedbirde fahriy qaravul tizilip, “Ögge! Ücümge! Vatan içün! Stalin içün!” şiarlar yazılğan ve stalinizmni teşviq etken plakatlar çıqarıldı.

Öz muracaatında Remzi İlyasov Stalin portretini ve yuqarıda aytılğan şiarlarnı alıp taşlamağa areket etken uquqqoruv hızmeti hadimleriniñ üstüne atılğan Ukraina halq deputatı, kommunist Sergey Topalovnı cezalanmasına talap ete. Şunı qayd etmeli ki, Stalin portreti tedbirniñ soñuna qadar turdı.
Remzi İlyasov qayd etti ki, ille matem mitinginde, iyün 22 künü Stalinni teşviq etmek, maqtamaq Avropa Şurası Parlament Assambleyasınıñ Qararına zıt kele.

“Stalin rejimi devrinde insanlıqqa nisbeten yapılğan zulum, sovet akimiyetine qarşı areketlerde beftan suçlanğan bütün bir halqlarnıñ sürgün etilgenini unutmaq mümkün degil, – dep yaza öz soravında Remzi İlyasov. – Bundan kelip çıqaraq, Ukrainada stalinizm teşviqatını cinayet olaraq tanımaq kerek ve qabaatlılarnı cevapkârlıqqa çekmek zarur.

Qanunlarımız esasında Siziñ bu işke prokurorlıq yanaşmañıznı, Cenk qurbanlarınıñ hatıra ve matem künü munasebetinen ötkerilgen tedbirde bulunğan insanlar areketiniñ qanuniyligini taqiqat etmeñizni rica etem”.