Qırım Yuqarı Şurasındaki «Qurultay-Ruh» fraktsiyası QMC Yuqarı Şurasınıñ «Krasnıy» sovhozında kontslager qurbanlarınıñ hatırasına abide qoyuv qararına deñişme ve qoşumca kirsetmekni rica ete

30 Sentâbr 2013

Qırım Yuqarı Şurasınıñ deputatları Remzi İlyasov ve Safure Kacametova QMC Yuqarı Şurasınıñ reisi V. Konstantinovğa muracaatta bulunıp, onda QMC Yuqarı Şurasınıñ “Krasnıy” sovhozında kontslager qurbanlarınıñ hatırasına abide qoyuv qararına deñişme ve qoşumca kirsetmek zarurlığını qayd eteler.

Saylavcılardan kelgen çoqtan-çoq muracaat ve talaplar esasında ve kerginlikke yol bermemek maqsadında Qırım Yuqarı Şurasınıñ deputatları Remzi İlyasov ve Safure Kacametova parlament yolbaşçısından Qırım Yuqarı Şurası ve Prezidiumınıñ ait qararına deñişme ve qoşumca kirsetmekni avale etmesini rica eteler.

Cümleden, öz muracaatında deputatlar sabıq kamp olğan yerni ebediyleştirmek qararı alınğanda kontslagerniñ faşistler Qırımğa bastırıp kirmezden bayağı evelce yani ta sovetler akimiyeti devrinde areket etkenini de köz ögüne almaq kerekligini qayd eteler. Bundan da ğayrı, QMC Yuqarı Şurasınıñ deputatları cemaatçılıqnıñ fikiri de esapqa alınıp, abideni qoyuv boyunca teşkiliy komitet erkânına eki professional tarihçı ve bunıñ kibi de QMC Yuqarı Şurasınıñ deputatı Leonid Pilunskiyni de kirsetmekni rica eteler.

Bunıñ kibi de deputatlar hatıra abidesiniñ tasdiqlanğan leyhasında hristian dini simvolikasınen bir sırada mıtlaqa musulman ve yeudiy dinleriniñ simvolikasından da qullanmaqnı ya da umumen diniy simvolikadan vazgeçmekni talap eteler.