Qırım Yuqarı Şurası 2014 senesi mart 11 künü qabul etken vesiqalarğa Qırımtatar halqı Meclisiniñ reisi Refat Çubarovnıñ izaatları

11 Mart 2014

Qırımtatar halqı Meclisiniñ reisi Refat Çubarov: “Qırım Yuqarı Şurasınıñ “Qırım Muhtar Cumhuriyeti ve Aqyar şeeriniñ mustaqilligi aqqında deklaratsiyası” serlevalı vesiqasına menfiy qıymet kesem. Qırım ve Qırım etrafındaki inqiraz çezilmengence bu kibi qararlarnıñ qabul etilmesi bu vaziyetten çıqmaq yollarını araştırğan taraflarnıñ alını daa da mürekkepleştire, dep sayam.

Bu aqta Qırımtatar halqı Meclisiniñ reisi Refat Çubarov Qırım Yuqarı Şurası mart 11 künü qapalı toplaşuvda qabul etilgen vesiqalarğa izaat berirken söyledi.

Qırım Yuqarı Şurasınıñ “Qırımtatar halqı aqları ğayrıdan tiklenmesiniñ kefillikleri ve onıñ Qırım cemiyetine integratsiyası aqqında”ki qararı hususında fikirini bildirirken, Refat Çubarov mezkür vesiqa çoq yıllar devamında qırımtatar halqı tarafından seslendirilgen tekliflerni mücessemleştirgen, dep saya. “Bu vesiqağa biz meslekdeşlerimizge (Ukraina ve Qırım Yuqarı Şuralarınıñ deputatlarına) çeşit şekillerde muzakere etmege teklif ettigimiz meseleler kirsetilgen. Bu, Qırım cemiyetine ve Qırımnı idare etmege dair, Qırımnı ağır aqibetlerge ketirebilecek areketlerden qorçalaybilecek printsipial meselelerdir”, – dep qayd etti Meclis reisi Qırım Yuqarı Şurası mart 11 künü qapalı toplaşuvda qabul etilgen vesiqalarğa izaat berirken.

Refat Çubarov bunıñ kibi de qayd etti ki, Meclis Qırım cemiyetiniñ terkibiy qısmı olğan qırımtatar halqı aqlarınıñ ğayrıdan tiklenmesi oğrunda tekliflerni daima seslendirip keldi.

“Teessüf ki, meslekdeşlerimiz bizni eşitmediler ve fevral 26 künü sessiya keçirmege tırıştılar, amma narazılıq mitingi sebebinden sessiya olmadı. Amma fevral 27 künü sessiya olıp keçti ve deputatlar biz aqibetlerini kördigimiz qararlarnı aldılar”.

R. Çubarovnıñ fikrince Qırım deputatları mürekkep bir vaziyette bulunaraq “Qırımtatar halqı aqları ğayrıdan tiklenmesiniñ kefillikleri ve onıñ Qırım cemiyetine integratsiyası aqqında”ki qararını alğanları Qırım parlamenti bugün artıq qırımtatar halqı aqlarınıñ ğayrıdan tiklenilmesiniñ zarurlığını añlağanlarını kösterdi.

“Qırım ve Qırım etrafındaki inqiraz içinde bulunğan taraflar içün sadece bir signaldır, – devam etti Çubarov. – Bu signalnı epsi taraflar – Kiyev, Moskva, Vaşington, Brüssel ve diger halqara teşkilâtlar eşitmeliler. Ümüt etem ki, böyle signallar esasında biz Qırım cemiyetini qasevetlendirgen meselelerniñ çezimini ve eñ evelâ silâlı askerlerniñ keri qaytarılmasını başlarmız”

Aynı zamanda Meclis reisi şunı da qayd etti ki, bu signal nasıldır bir añlaşmalarnıñ mevzusı olamaz.

“Referendum” meselesi boyunca pozitsiyamıznı kesinlikle belgiledik. Biz “referendum” keçirilmesine qarşımız, onı boykot yapamız ve Qırım sakinlerine böyle “referendum” keçirilmesiniñ aqibetlerini añlatmağa tırışamız, – dedi R. Çubarov. – Tabiiy ki, biz Qırım ükümetini şekillendirüvde de iştirak etmeymiz, çünki o mevcut qanunlarğa zıt şekilde meydanğa ketirildi. Böyleliknen, biz eñ yaqın zamanda Qırımda inqiraz çeziminiñ açıq yolları halqara cemiyet azaları tarafından tapılması kerek, dep sayamız”