Qirim Türkleri medeniyet ve yardimlaşuv cemiyeti merkeziniñ delegatsiyasi qirimtatar halqi Milliy Meclisiniñ reisi Mustafa Cemilevnen körüşti

22 Iyün 2011

2011 senesi iyün 21 künü Qırımtatar halqı Milliy Meclisiniñ reisi Mustafa Cemilev, onıñ birinci muavini, Bütündünya qırımtatarlar kongressiniñ prezidenti Refat Çubarov Qırım türkleri medeniyet ve yardımlaşuv cemiyeti reisiniñ vekili Tuncer Qalqay reberligindeki delegatsiyanı Milliy Meclisniñ ofisinde qabul ettiler.

Qırım türkleri medeniyet ve yardımlaşuv cemiyeti merkeziniñ azaları bildirgenine köre, Qırımğa ziyaretleriniñ maqsadlarından biri cemiyetniñ teşebbüsi ile “Qırım” vaqufınen birlikte teşkil etilgen Ahmet İhsan Qırımlı adına edebiy yarış ğaliplerine mukâfatlarnı taqdim etüvdir.

“Edebiy yarış eki yaş kategoriyasında – yani 12-den 16-ğace ve 17-den 29 yaşınace Ukraina, Romaniya, Rusiye, Türkiye ve Latviyadan 109 nefer vekilleriniñ iştirakinde keçirilip, mukâfatlarnıñ miqdarını “Qırım” vaqufı belgiledi. İşte, yarışta 1-nci yerni qazanğan gençke 4 biñ dollar, ekinci yer içün – 3 biñ ve üçünci yer içün 2 biñ dollar. 2010 senesinden itibaren Türkiye qırımtatar medeniyet ve yardımlaşuv cemiyetiniñ reisi Ahmet İhsan Qırımlı adına edebiy yarış er sene ötkerilecek – dedi merkez reisiniñ vekili Tuncer Qalqay.

Yarış nevbetnen nazm ve nesir saalarında keçirilecek. Bu sene şiir yazğan gençler küçlerini sınadılar. Yarışta iştirak etmekniñ esas şartı – eserlerniñ qırımtatar tilinde latin urufutında yazılmasıdır.

Ğaliplerge mukâfatlar taqdim etüvniñ tantanalı merasimi 2011 senesi iyün 22-de Qırım müendislik-pedagogika universitetinde saat 14-te olıp keçti.

Aynı şu künü Türkiye delegatsiyası “Közaydın” resurs-informatsiya merkezi ve “Nenkecan” qadınlar klubı “Yeşil ada” banket salonında teşkil etken “Ayneni” SD diskiniñ ve “Nenkecan” mecmuası yañı sanınıñ taqdiminde iştirak etti. Qırımtatar halqı Milliy Meclisi, devlet organları, cemaat teşkilâtlarınıñ 200-den ziyade vekilleri iştirakinde keçirilgen bu körüşüvde Türkiye qırımtatar medeniyet ve yardımlaşuv cemiyeti merkeziniñ azaları cemaatqa tanıtıldı. Çıqışta bulunğan Milliy Meclis reisi Mustafa Cemilev, Bütündünya qırımtatarlar kongressiniñ prezidenti Refat Çubarov, Qırım musulmanlarınıñ müftisi acı Emirali Ablayev, genel merkez reisiniñ vekili Tuncer Qalqay, merkez reisiniñ yardımcısı Namıq Kemal Bayar, merkez qadınlar komissiyasınıñ reisi Necla Qalqay “Ayneni” leyhası ve qırımtatar tilinde latin urufatında neşir etilgen “Nenkecan” mecmuasınıñ tilimizni saqlav, medeniyetimizni inkişaf ettirüvdeki emiyetini qayd ettiler.

Delegatsiya azaları iş ziyareti çerçivesinde Kezlev, Qarasuvbazar, Sudaq ve Bağçasaray şeerlerinde faaliyet köstergen cemaat teşkilâtları, milliy mekteplerni ziyaret etmek, iyün 26 künü Milliy bayraq bayramında iştirak etecekler. Musafirler Türkiyeden bu bayram içün mahsus bahşışlar da ketirdiler.

Şunı da qayd etmeli ki Qırımtatar cemiyeti merkeziniñ er taraflı qoltutuvında belli qırımtatar ressamı Ramiz Netovkinge Türkiyede ameliyat yapılacaq.
Türkiye qırımtatar cemiyeti merkeziniñ azaları Qırımğa muntazam sürette kelip, halqımızğa yaqından yardım köstereler. Belli ki al-azırda Türkiyede 3 milliondan ziyade qırımtatar yaşamaqta.