Qırım Nazirler Şurasınıñ reisi Anatoliy Mogilev Qırımtatar halqınıñ öz vatanında aqlarını ğayrıdan tiklev meseleleri boyunca halqara forumnıñ keçirilmesine qoltuttı

19 September 2012

“Bu forumnı keçirmek kerek, dep sayam, lâkin başta onıñ formatını belgilemek lâzim”, – dedi Qırım Nazirler Şurasınıñ reisi Anatoliy Mogilev Qırımtatar halqı Meclis yolbaşçılarınıñ elçilikler ve Ukrainada akkreditatsiya etilgen halqara teşkilât reberlerinen Kiyevde sentâbr 18 künü ötkerilgen körüşüvde çıqışta bulunırken.

Anatoliy Mogilev Halqara forumnıñ formatını ve onda baqılacaq meselelerni belgilemekni teklif etti. “Biz Forumğa qoltutmağa ve atta onı Qırımda keçirmege azırmız”, – dedi Mogilöv.

Qırım regionınıñ inkişafı ve sürgünlikten qaytayatqan qırımtatarlarnı yerleştirüv programmasınıñ amelge keçirilmesi hususında aytırken, Qırım ükümetiniñ başı Qırım Halqara Biznes Birliginiñ Qırım ve sakinleri menfaatı oğruna regional iş adamlarınıñ iqtisadiy işbirligi aqqında açıq dialog başlamaq teşebbüsini maqulledi.

“Biz bu meselede añlaşırmız ve Qırımnıñ ealisi, şu cümleden qırımtatarlar içün de, normal iş yerlerini açacaq biznes leyhalarnı amelge keçirüvde yardım etmege azırmız”, – dep qayd etti Mogilöv.

2012 senesi sentâbr 18 künü Kiyevdeki “Hyatt” ötelinde Qırımtatar halqı Meclisiniñ yolbaşçıları Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüştiler.

Esas maruzalarnen Qırımtatar halqı Meclisi yolbaşçılarınıñ Ukrainadaki elçilikler ve akkreditatsiya etilgen halqara teşkilâtlarınıñ reberlerinen körüşüvinde Meclis reisi, Ukraina halq deputatı Mustafa Cemilev, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov, Qırım Nazirler Şurasınıñ reisi Anatoliy Mogilöv, “Qırım inkişafı vaqufı” hayriye teşkilâtınıñ prezidenti Rustem Ümerov, OSCE Aliy Komissarınıñ mesleatçısı Aleksandr Vinnikov, Halqara Forumğa azırlıq çerçivesinde Qırımdaki vaziyet aqqında esabat azırlav boyunca mustaqil ekspertler gruppasınıñ halqara koordinatorı Endrü Vilson çıqışta bulundılar.

Körüşüvge bunıñ kibi de Ukraina Prezidenti Memuriyetiniñ vekilleri, Prezitentniñ Qırımdaki daimiy temsilcisi Viktor Plakida, Ukraina tışqı işler nazirligi hadimleri ve Ukraina içtimaiy siyaset naziri davet etildiler.

Körüşüv “Qırım inkişafı vaqufı” hayriye teşkilâtınıñ qoltutuvında keçirildi