Qırım musulmanlarınıñ diniy idaresinde Meclis reisi ve Qırım musulmanlarınıñ müftisi 6 çağırılış Qurultayğa delegat saylavnıñ iştirakçilerinen körüştiler

12 April 2013

2013 senesi, aprel 12 Qırım musulmanlarınıñ diniy idaresinde Meclis reisi Mustafa Cemilev ve Qırım musulmanlarınıñ müftisi acı Emirali Ablayev 6 çağırılış Qurultay delegatlarını saylavnıñ iştirakçileri – qırımtatar siyasiy ve cemaat teşkilâtları ve blokları vekillerinen körüştiler.

Körüşüvde Qurultay delegatlarını saylav boyunca Merkeziy saylav komissiyasınıñ reisi Zair Smedlâyev, bunıñ kibi de “Maarifçi”; “Bizim Qırım”; “Qırımtatar medeniyet vaqufı”, “İnkişaf” qırımtatar cemaat teşkilâtı, “Adalet” qırımtatar milliy partiyası, “Yaşlar Şurası” cemaat teşkilâtı, “Avdet” cemaat teşkilâtı, Qırımtatar halqı milliy areketiniñ teşkilâtı (OKND); “Milliy Haq” saylav blokı, ; “Qardaşlıq-Qarasu – Qırımtatar yaşlar merkezi saylav blokı, “Küreş” Qırım milliy küreş federatsiyası, Qırımtatar yaşlar merkezi, “Arqadaş” uquqqorçalayıcı cemaat teşkilâtı; “Azatlıq” saylav blokı ve “Qırımtatar qadınlar birligi” cemaat teşkilâtınıñ azaları iştirak ettiler.

Körüşüv devamında Qurultayğa delegatlarnı seçüv, mayıs 6-da keçirilecek Hıdırlezge azırlıq, qırımtatarlarnıñ Vatandan sürgün etilgenleriniñ 69 yıllığı munasebetinen ötkerilecek Bütünqırım matem mitingine azırlıq kibi meseleler muzakere etildi. Körüşüv iştirakçilerine hıtap etken Qırım musulmanlarınıñ müftisi acı Emirali Ablayev milliy qurultayğa seçimlerde iştirak etken er bir qırımtatarnı, angi fikir ve baqışları olğanından qatiy nazar biri-birini ürmet etmege çağırdı. “Qurultaynıñ yañı erkânı ve soñra saylanğan Meclisniñ nasıl olmasına halqımıznıñ vaziyeti bağlı olğanını unutmağa aqqımız yoqtır”, dep qayd etti müftiy efendi.

Meclis reisi Mustafa Cemilev qırımtatar cemaat ve siyasiy teşkilâtlarnıñ azalarına, olarnıñ bloklarına şunı hatırlattı ki, Delegatlarnı saylavnıñ yañı nizamına köre seçimler yañı saylav sisteması boyunca umumiy, musaviy, doğrudan-doğru haq esasında gizli rey berüv yolunen olacaq. M. Cemilevniñ aytqanına köre ilk sefer saylav ketişatını halqara nezaretçiler közetecekler. Bizim vazifemiz saylavlarnı yüksek teşkilâtiy seviyede. Nizamğa boysunılğanı alda ve dünya demokratik printsip ve normaları esapqa alaraq keçirmektir.

Matem mitingine azırlıq işleri muzakere etilgende Meclis reisi körüşüv iştirakçilerine saylavaldı programmaları çerçivesinde yerlerde bulunğanlarında semetdeşlerimizge mayıs 18-de Aqmescitniñ merkeziy meydanına kelmek ve böyleliknen birlik-beraberligimizni numayış etmek zarurlığını añlatmalarını rica etti. “Halqımız içün facialı bir künde bir yerde toplanıp, soyqırım qurbanlarını añmaq ve aqlarımıznıñ tiklenilmesini talap etmemiznen irademiz ve eminligimizni köstermek kerekmiz”, – dedi M. Cemilev.

Qurultayğa delegatlarnı saylavğa dair fikir paylaşuv devamında körüşüv iştirakçileri özara añlav ve sayğı müitinde iş alıp barmaq, milliy idare organlarına saylavnıñ hususiyeti semetdeşler ögünde mesüliet ve Milliy areketni pekitmektir, dediler körüşüv iştirakçileri.

Hıdırlez bayramına azırlıq işleri baqılğanda körüşüv iştirakçileri halqımız faqat facialı künlerde degil de, ananeviy qırımtatar halq bayramları qayd etilgen vaqıtta da birlikte olmalı ki, bizni parçalamağa tırışqanlarnıñ areketleri nafile olsun, degen fikirni bildirdiler.