Qırım musulmanlarınıñ diniy idaresinde «Hidayet» gazetası ve onıñ baş muarriri Zakir Qurtnezirniñ yubileyi qayd etildi

05 Dekabr 2013

Aqmescitte Qırım musulmanları diniy idaresiniñ meclisler zalında onıñ resmiy neşir organı “Hidayet” gazetasınıñ 20 yıllığı ve onıñ baş muarriri, yazıcı, şair, terciman Zakir Qurtnezirniñ 80 yıllıq yubileyi tantanalı sürette qayd etildi. Yubilârnı Milliy Meclis azaları, qırımtatar yazıcıları, jurnalistler, milliy areket iştirakçileri hayırladılar.

Tedbirniñ başında Zakir Qurtnezirniñ ömüri ve faaliyeti ve “Hidayet” gazetasınıñ meydanğa kelüv tarihını aydınlatqan levha kösterildi.

Tedbir qaramanınıñ selâmlav sözünden soñ onı Qırım musulmanlarınıñ müftisi acı Emirali Ablayev hayırlap, “Hidayet” gazetası qırımtatar halqı tarihiy Vatanına qaytqan soñ neşir etilgen birinci diniy neşir olğanını qayd etti.

Gazeta 10 biñ nushada neşir etilip, Qırımda İslâmnıñ ğayrıdan tiklenmesine hızmet etmekte. Müftiy kelecekte gazetanıñ tirajı 50 biñge yetecegine eminlik bildirdi, çünki Qırımda İslâm dininiñ yaşamasında onıñ rolü pek büyüktir. Haci Emirali Ablayev Zakir Qurtnezirge çoqyıllıq namuslı hızmeti içün teşekkür bildirdi ve Müftilik endi 20 yıldan berli çıqarıp kelgen gazetanı meydanğa ketirmek teşebbüsinen aynı Zakir Qurtnezir çıqqanı ve bu işni boynuna alğanını hatırlattı. Fedakâr emegi içün yubilârğa leptop bağışladılar.

Milliy Meclisniñ reisi Refat Çubarovnıñ adından Zakir Qurtnezirni ve onıñ muarrirliginde çıqaan “Hidayet” gazetasınıñ 20 yıllığınen reis muavini Ayder Acimambetov hayırladı. Qırımtatar yazıcıları arasından eñ qartlarından biri olğan Zakir Qurtnezir yaşlar içün ibrettir, dedi Ayder Acimambetov.

Qırımtatar yazıcılar birliginiñ reisi Riza Fazıl şunı ayrıca qayd etti ki, Zakir Qurtnezir birinci diniy gazetanı meydanğa ketirmeknen bir sırada 1999 senesi acılıqqa barıp kelgen soñ yazıcılar arasında birinci olıp Mekkege acılıq aqqında yazdı. Zakir Qurtnezir daa çoq kitaplar yazar, dedi R. Fazıl. Yubilârnıñ kendisi ise yaqın künlerde onıñ eki kitabı dünya yüzüni körecegini haber etti.

Sıcaq dostane müitte keçken tedbirde yubilârnıñ adına samimiy tebrik sözleri yañğıradı. Tantanalı qısımdan soñ tedbir iştirakçilerini “Hidayet” gazetası logosınen süslengen tortnen sıyladılar.

Malümat içün: Zakir Qurtnezir – qırımtatar yazıcısı, şair ve jurnalist. 1933 senesi dekabr 2-de Balıqlava rayonınıñ Varnautka köyünde dünyağa keldi. Jurnalist olaraq emek faaliyetini 1957 senesi Özbekistanda başladı. 1993 senesinden başlap bugünge qadar “Hidayet” diniy gazetasını neşirge azırlamaqta. 1982-2009 seneleri Zakir Qurtnezir “Yıldız” mecmuası muarririniñ muavini oldı. Onıñ qalemi altından bir qaç şiirler cıyıntığı, povest ve ikâyeler kitapları, diniy kitaplar neşir etildi.

“Hidayet” gazetası 1993 senesinden berli 10 biñ nushada ayda bir kere çıqa. Gazeta esasen İslâm esasları, Qırımda diniy ayat mevzularını aydınlata.