Qırım müftisi Kefede haç qoyulmasını toqtatmadı rica ete

02 Sentâbr 2011

Malüm oldı ki, Qırım Nazirler Şurası Kefe şeerinde pravoslav haçını qoymaq içün daimiy faydalanuvğa yer ayırmaq qararını aldı. Mezkür topraq damartısı Kefede Canköy-Kerç avtomobil yolu rayonında ayırılğan.

Qırım Nazirler Şurasınıñ işbu qararı munasebetinen Qırım musulmanlarınıñ müftisi acı Emirali Ablayev Kefe şeeriniñ başı Aleksandr Bartenevğa muracaatnen bulundı. Onda bu diniy belgini tiklemek içün yer ayırmaq qararı Musulmanlarnıñ diniy idaresinen kelişilmegeni alda qabul etilgeni qayd etile. “Mezkür qararınen Qırım Nazirler Şurası 2001 senesi fevral 13-te qabul etken №33 “Qırım Muhtar Cumhuriyetinde dinlerara munasebetlerni stabilleştirüv boyunca bazı tedbirler aqqında”ki Qararınıñ 3-nci maddesini boza, denile.

Bunıñ kibi Qırım müftisi E.Ablayev dey ki, haçnıñ qoyulmasına “Kefe” musulman cemiyetiniñ reisi razılıq bergeni belli oldı, albu ki diniy belgilerni qoymaq meselesi ayrı bir musulman cemiyetlerine ait olmadan, doğrudan-doğru Qırım musulmanları diniy idaresiniñ imayesindedir.
“Zanımızca, mezkür meseleniñ bir taraflı çezilmesine yol bermeden, diger diniy, şu cümleden musulman, cemiyetleriniñ vekillerinen aqıl tanışılğanı alda al olunmaq kerek, – dey Qırım müftisi haci Emirali Ablayev.

Qırım musulmanlarınıñ müftisi acı Emirali Ablayev Kefe şeeriniñ başı Aleksandr Bartenevğa muracaatında Kefeniñ Canköy-Kerç yolunda pravoslav haçını qoymaq boyunca vesiqalar azırlav ve resmiyleştirüv işini bu meseleni Qırım musulmanları diniy idaresinen muzakere etmegenge qadar toqtatmaqnı rica ete.