«Qırım inkişafı vaqufı» İsmail Gasprinskiy ömüri ve faaliyetine bağışlanğan işler yarışınıñ neticelerine yekün çekti

04 Sentâbr 2013

“Qırım inkişafı vaqufı” Hayriye teşkilâtı 2013 senesi baarde ilân etilgen İsmail Gasprinskiy ömüri ve faaliyetine bağışlanğan işlerniñ er yıllıq
Ekinci yarışı neticelerine yekün çekti

Fondnıñ matbuat hızmetinde bildirgenlerine köre bir çoq işler yarış mevzusına uymasa da, teşkilât idaresi olarnıñ aktualligini esapqa alaraq yarışta iştirak etmege izin berdi. “Aynı şu sebeplerge köre Fond mukâfatlarnıñ sayısını altıdan üçke eksiltip, miqdarını arttırdı. Birinci mukâfat 5 biñ, ekinci mukâfat – 3 biñ ve üçünci mukâfat 2 biñ grivnânı teşkil etecek, – dep haber ettiler Fondnıñ matbuat hızmetinde.

Yarış iştirakçileri arasında ğalip olaraq aşağıdaki işler tanıldı:

Birinci mukâfat:

“Bağçasaray tarihiy-medeniy qoruq” İsmail Gasprinskiyniñ müzeyi

“İsmail Gasprinskiyniñ kabineti” ve “Bağçasaray 19-20 asırlarda fotoresimlerde” ekspozitsion leyhaları ve “İsmail Gasprinskiy evini ğayrıdan tiklev leyhası” içün

Ekinci mukâfat:

Gülnara BEKİROVA, siyasiy ilimler namzeti, QMPU Tarih-filologiya fakulteti tarih kafedrasınıñ üyken ocası, “Tarih sedası” (ATR telekanalı) programmasınıñ müellifi ve alıp barıcısı

ATR telekanalında yayınlar türkümi içün:
“İ.Gasprinskiy tercimeiyalınıñ yılnameleri”;
“Ulu qırımtatar mütefekkiri İ. Gasprinskiyniñ ğayelerinde zamannıñ “belâlı meseleleri” ve dünyabaqışınıñ esas printsipleri;
“İsmail Gasprinskiyniñ intellektual variyetinde qadın meselesi”;
“Terciman” gazetası – açıluvınıñ yubileyine”

Üçünci mukâfat

Andrey İVANETs, Milliy İlmiy-tedqiqat institutı Qırım bölüginiñ konsultantı, T. Şevçenko adına İlmiy cemiyetniñ azası.

“İnqilâp devriniñ ukrain-qırımtatar ittifaqı. Kerçekleşmegen alternativa ya da 1917 senesi Merkeziy Şurağa Qırım musulmanları delegatsiyasınıñ sırı” serlevalı tarihiy-publitsistik essesi içün

Bunıñ kibi de Bağçasaraydaki “Larişes” ve “İsmail Gasprinskiyniñ müzeyi”niñ hadimlerini taqdirlemek içün 500 grivnâdan 4 mukâfat tesis etildi.