«Qırım» gazetası qapatıluv telükesi altında

01 July 2013

Ukraina Devlet bücetinden finansirlengen “Qırım” gazetası 2013 senesinde deyerlik iç bir kapik almadı. Neticede, borclar ödelmedi, jurnalistler maaşsız qaldı, gazeta ise qapatıluv telükesi altındadır.

Bu aqta Facebookta öz saifesinde Meclis reisiniñ birinci muavini Refat Çubarov bildirdi. Bu malümatnı “Qırım” gazetasınıñ baş muarriri Bekir Mamutov da tasdiqladı.

“Deyerlik” dep yazam, çünki 2013 senesinde berilmesi közde tutulğan 319,0 biñ grivnâdan mayıs ayınıñ soñunda kelgen 74,0 biñ grivnâsı qaznadan keçirilmey”, – dep yaza Refat Çubarov.

Çubarovnıñ qayd etkenine köre “Qırım” gazetasınıñ baş muarriri Bekir Mamutov sermiyalarnı taqsimlevnen oğraşqan Ukraina Sotsial siyaseti nazirliginiñ başı Natalya Korolevskayağa yardım sorap muracaat ete. Amma Korolevskaya bu muracaatnı Qırım İnformatsiya komitetine yollay.

Qırım İnformatsiya komiteti reisiniñ muavini Ayder Emirovnıñ gazeta hadimleriniñ özleri tesis etilgeninden dolayı kendi masraflarını kendileri qarşılamalılar, degen cevabını Refat Çubarov aqaretleyici, dep saya.

Emirov “içtimaiy siyaset nazirine “Qırım” gazetasına yardım etmek şu nazirniñ elinde olğanını, yeter ki Sotsial siyaset nazirligiUkraina Devlet bücetinde “Qırım” qırımtatar gazetasını finansirlenmesine dair maddeni amelge keçirmek kerekligini aytmağa cesareti yetişmedi”, dedi Çubarov.

“Eger onıñ çeşit jurnalistik seminarlar ve tögerek masa subetlerinde milliy matbuat vastalarına devlet tarafından maddiy destek kösterilmesi kerek, çünki mevcut obyektiv sebeplerge köre olar böyle yardımsız çalışıp olamazlar degenine inanacaq olsaq Matbaa saasında Ayder Emirov acemi degil kibi körüne…” – dep yaza Çubarov.

Bunıñ kibi de Çubarov emin ki, Cumhuriyet İnformatsiya komitetiniñ hadimi ala bugünge qadar “gazetanıñ finans qaynaqlarından” habersiz olğanı çoq şeylerni añlata.