Qırım cemaatçılığı Qırımtatar milliy areketiniñ veteranı Server Eminov ile vedalaştı

09 Iyül 2013

2013 senesi iyül 9 künü Qırım cemaatçılığı Qırımtatar milliy areketiniñ faal iştirakçisi, 66 yaşlı veteranı Server Eminov ile vedalaştı . Bütün ömürini o, halqınıñ Vatan oğrundaki küreşine bağışlap, elinden kelgen hızmette bulundı.

Server Eminovnı soñki yolğa ozğarmaq içün aqrabaları, eş-dostları, Meclis topraq komissiyasınıñ reisi Zevcet Kurtumerov, Medlis tışqı alâqalar bölüginiñ başı Ali Hamzin, QMPU rektorı Fevzi Yakubov, qırımtatar cemaatçılığı keldi.

“Server Eminov Meclisniñ Orta Asiyadaki temsilciliginiñ faal iştirakçilerinden biri edi, dedi Ali Hamzin. – Aynı onıñ sayesinde 1999 senesi biz Ferğanada büyük toplaşuv keçirip, pek çoq semetdeşlerimizge Ukraina vatandaşı olmağa yardım ettik. Allah rahmet eylesin”

Server Eminov, Qırımğa qaytqan soñ Balaklavskaya soqağında “Yañı dunya” maallesinde topraq alıp, eV qurdı. Amma evni resmiyleştirmege yetiştirmedi, çünki akimiyet alâ daa topraq meselesini çezmey, şu cümleden Balaklavskaya massivinde evlerni resmiyleştirüv saasında müsbet qarar almay.

“O, milliy areketke yardım etken, lâkin kendileri kölgede qalğan insanlardan biri edi. Allah rahmet eylesin! – dedi Zevcet Kurtumerov. – Onıñ hayırlı işleri, halqınıñ vatanğa qaytması içün areketleri hatıramızdan iç silinmez. Biz bugün onıñ ile vedalaşırkenmiz, bu sadece cenaze olmağanını, yedi yıldan berli mında yaşağanlarnıñ meselelerini çezmegen akimiyet organlarına tenbiye olğanını bildirmege isteyim. Bu maallede toylar oldı, balalar doğdı, atta torunlar da peyda olıp başladı, amma insanlar öz topraqlarınen qanun boyunca qullanıp olamaylar. Balaklavskaya massivi kibi massivlerniñ meselesini devlet çezmesi içün bu bir signal olmalı”.